Un’elezzione sindicale per dui vincidori ? GP o GI – CGC, dicenu chì a vittoria hè soia

Vutavanu stu marti i studienti di l’Università di Corsica per l’elezzione generale, duie liste s’eranu prisentate : una purtata da a Ghjuventù Paolina è l’altra cumposta di a Ghjuventù Indipendentista è a Cunsulta di a Ghjuventù Corsa addunite per st’occasione. Traminduie anu annunziatu a vittoria…

Eri sera inde i carrughji di Corti, ogni candidatu dicia avè vintu st’elezzione generale. L’oghjettivu di u scrutinu hè d’eleghje raprisentanti di studienti à u cunsigliu d’amministrazione di l’Università, ma dinù inde i CFVU (cummissione di a furmazione è di a vita universitaria) è inde i CR (cummissione di ricerche). Hè per quessa chì a CGC-GI dice avè vintu, sò elli chì anu i soli raprisentanti eletti inde i CR, a Ghjuventù paolina ùn avia micca prisentatu candidati. 

L’unione Ghjuventù Indipendentita-Cunsulta di a Ghjuventù Corsa hà dunque un più grande numeru d’eletti à l’università di Corsica di manera generale. Per Rachel Regetti, presidente di a GI, hè impurtante : « tutti i studienti sò cusì raprisentati, simu inde a cuntinuità « d’uniti per l’università » (a lista d’unione GI-CGC chì avia vintu à l’ultime elezzione generale in u 2020) »    

Impurtenza di i voti o di l’eletti ?  

In fatti GI-CGC è GP sò dunque à paru inde e strutture, s’ellu si parla di raprisentazione sindicale : à u cunsigliu d’amministrazione è i CFVU. Ma a GI-CGC hè sola inde i cunsiglii di ricerca ciò chì li face 11 raprisentanti contr’à 9 per a GP. 

Ma a Ghjuventù Paolina spiega avè vintu anch’ella. U sindicatu conta 123 voti di più chì l’unione GI-CGC, ciò chì face dì à u so presidente, Armand Occhiolini, chì « nimu hà persu ma a GP hà vintu a legitimità di i studienti. » U sindicatu paolistu ottene u listessu numeru di raprisentanti à u CA è a i CFVU chè a GI-CGC, ma nisunu inde i CR. Per elli a spiegazione hè simplice « ùn aviamu prisentatu à nimu in cunsiglii di ricerche, chì ùn emu micca dutturanti. » 

Ma a guvernenza si face à u Cunsigliu d’amministrazione… 

U core di st’elezzione ferma quantunque u CA (cunsigliu d’amministrazione). Risultatu : 3 raprisentanti per ogni struttura ma a GP si dice appena dilusa d’avè mancatu u quartu futtogliu per solu 11 voti. Quist’annu più di 21% di studienti di l’università di Corsica anu vutatu per sceglie i so raprisentanti. Una participazione chì cambia pocu di pettu à l’annate passate.