40 anni di l'Università di Corsica : "C'era un veru prugettu di sucetà"

Terza aghjunta à a merria di Bastia, incaricata di a cultura, Mattea Lacave hà fattu i so studii in Corti induva era liceana dinò. Hè entruta à a facultà un annu dopu a so apertura pà studià e lingue straniere è u corsu.

France 3 Corse : Chì era u vosciu sintimu quandu seti ghjunta à l’università in u 1982 ?

Mattea Lacave : Quandu l’università hè stata aperta, eru liceana in Corti. Dunque eiu, l’aspettavu l’apetura. Eru à l’internatu di u liceu chì hè sopra à l’università è, tutti i ghjorni, c’eranu i travagli, i casali chì si custruivanu. Allora fighjulavamu è ci diciamu "hà da apre, hà da apre". Era cum’è un sognu. Ùn ci crediamu micca. Per mè, era une dimarchja parsunale d’attesa, è una vuluntà di scrivemi à l’università per fà i studii, mà sopratuttu per avè dinò un accunsentu cù i mo idei naziunalisti. À l’epica, pensavu chì a lotta di a ghjuventù corsa era arradicata à u sviluppu di l’università.

Ch’ani fattu i vosci cumpagni di u liceu ? Sò stati in Corti pà studià ?

Micca tutti, mà una parte sì. Certi sò partuti nant’à u cuntinente perchè prima c’era trè filiere. À l’epica, ùn c’era manca i studii corsi. Quandu sò ghjunta eiu à l’università, in u 1982, era l’apertura di i studii corsi mà prima ùn era micca un DEUG, era una spezia di diploma è dopu l’anu cambiatu in Deug in 1983 mi pare. In 83, emu occupatu u retturatu è emu avutu a seconda parte di Grossetti, di pettu à e stanze. Emu avutu l’apertura di e licenze à una mansa di posti dinò per l’università. C’hè statu veramente una grande lotta per u sviluppu di l’università trà 1981 è 1985.

Ch'avete studiatu ?

Aghju fattu "Langues étrangères appliquées" (LEA) è dopu studii corsi à tempu. Sò statu cinqui anni à l'università. Eru dinò à a Cunsulta di i Studienti Corsi. Dopu, aghju avutu u cuncorsu di a scola nurmale è sò diventata maestra. Mà quandu sò esciuta di a scola nurmale, aghju compiu a mo licenza di corsu. Sò vultata dinò in u 2011 in Corti per passà un Master di scienze di l’educazione.

Siconda voi, chì hè l’evoluzione maiò di l’università ? 

Oghje, c’hè veramente un'offerta di furmazione abbastanza cumpleta. È c’hè sempre ssa voglia d’arradicà l’università à l’avvene di u populu corsu per avè a risorza umana ch’ellu ci vole per fà u nostru sviluppu culturale, economicu è scientificu nant’à nostra terra. Pensu dinò chì c'hè un filu rossu trà a so apetrura è ancu avà cù i discorsi d’issa vuluntà chì a ghjuventù pudesse avè i diploma è una furmazione di qualità, mà per forse da investisce torna nant’à u territoriu.

Quidd'idea era digjà forte à u principiu di l’anni ottanta ?

Iè. C’era un veru prugettu di sucetà chì s’era fattu ingiru di l’università. Mà era cumplicatu perchè l’università era cunfruntata à una norma ch’ùn era micca fatta pà una facultà cum’è Corti. Ci vulia un cifru precisu di studienti per apre i posti. L’affare era cumplicata. A regula generale chì era in piazza pà tutte e facultà di u cuntinente ùn era micca valevule in Corsica. Ci vulia subitu un statutu d’autunumia per l’università, cù una carta di furmazione adatta à i bisogni di l'isula. Dopu, sottu à a presidenza d'Antoine Aiello, l’università hà pigliatu un’altra dimensione.

Pà vò, chì li manca oghje ?

Eiu, perchè aghju una fumazione piuttostu litteraria, mi piacerebbe ch’ellu ci fussu à pena di più di filosofia è di scienze suciali. Mà dinò, sarebbe bè chì l’università abbia mezzi in più per avè una valutazione di u bislinguisimu è di l’insegnamentu bislingu ; ch’ellu sia più sviluppatu per riflette nant’à a nostra sucetà bislingua è nant’à l’insegnamentu di u corsu. Sarebbe un pocu cum’è un laburatoriu induve si pò studià à u livellu suciologicu è linguisticu per cunosce l’impattu di l’insegnamentu bislingu nant’à a sucetà è ciò chì ci manca per fallu cresce.

Sè ci vulia à ritene una fiura d’issi 40 anni ?

Ghjè vera chì quelli chì sò stati à l’università da u mo tempu à mè, ci sò parechji ch’anu respunsabilità à u livellu puliticu è à u livellu di l’università. Di vede certe persone oghje esse à sti posti custì, ùn mi stona mancu perchè eranu dighjà ghjente indiate quand'eranu studienti.