Cinquant’anni di carriera, guasgi 500 canzone, un successu planetariu. Eccu un riassuntu di u duettu Regina et Bruno. Sta dumenica, u 23 di maghju, a cantatrice si n’hè morta à 90 anni, 20 anni dopu à u so cumpagnu Bruno Bacara.
Pierrette Melicucci, stu nome ùn vi dice forse nunda. Eppuru, hè u veru nome di Regina di u coppiu Regina et Bruno. A cantatrice si n’hè morta sta dumenica 23 di maghju in Cavru.
Incù 38 album è 490 canzone, Regina è u so cumpagnu Bruno Olivieri dettu Bruno Bacara, furmavanu un coppiu prulificu durante l’anni sessanta. Ma hè in u 1952 ch’eddi si scontranu u dui cantatori, in Pariggi, allora chì Regina “la voix du maquis” si truvava senza ghitaristu.
3 millioni di dischetti
Deci anni più tardi, in u 1962, a so carriera piglia una dimensione manc’appena aspittata. Dominique Marfisi è Bruno Bacara cumponenu Solenzara. A canzona diventa un successu pianetariu, guasgi 500 versione sò arrighjistrate frà e quale 27 in lingue stagnere, è u tittulu hè vindutu à 3 millioni d’esempiari.
Dopu à l’anni sessanta, l’esistenza di u gruppu hè più difficiule, colpa à a nascita di i gruppi polifonichi cume Canta u Populu Corsu o i Chjami Aghjalesi durante l’anni settanta è u principiu di u Riacquistu.
Sin’à a fine di l’anni novanta, u coppiu cumpone è cante sempre, ma in u 2001 more à Bruno Bacara. Vint’anni dopu, Regina u raghjunghje è porta incù edda i so ottu dischetti d’oru vinti in cinquant’anni.
