A Sardegna hà parechji sumiglii cù a Corsica ma dinù unepochi sfarenzi. À livellu linguisticu, in Sardegna parechji lingui sò parlati. Sè à u Nordu, u galluresu s'assumiglia assai à u corsu cù a varietà sartinesa, u sardu parlatu in 2/3 di u tarritoriu hè cumplettamenti sfarenti. Siani ciò chì siani e varietà, a lingua raghjunali hè monda parlata ma poca insignata.
U parlatu galluresu s’assumiglia à u corsu di u sartinesu è u rucchisgianu. Durante stu riportu emu scontru dui ghjuvanotti, tremindui in quarta in Aghju, una cumuna di u nordu di a Sardegna vicinu à a cità di Tempiu Pausania.
Sariani 100 000 i lucutori di u galluresu. Incù u corsu ci sò unipochi di variazioni, si dici saldu par sardu, candu par quandu, steddi pà ziteddi. 20% di i parolli com’è faiddà chì vò dì parlà venani da u sardu. A lingua hè parlata ancu da i ziteddi.
Scambii culturali è linguistichi
Una scola di quarta di Portivechju hè ricivuta in Aghju pà scambii culturali è linguistichi. A cullitività di Corsica, a cumuna di Portivechju è u prugrama Erasmus ani participatu à u finanzamentu.
Hè stata dumandata à i parenti s’eddi vuliani fà imparà à i figlioli u galluresu à a scola un’ora a sittimana o insignalli a tradizioni. Ùn hè micca a lingua chì hè stata scelta.
/regions/2024/06/14/sardu-language-map-scaled-666c47de63fb5899962703.jpg)
Sò parechji i lingui parlati in Sardegna. In u nordu in più di u galluresu ci hè a varianti sassaresa quì in ciaddu. In Algheru quì in turchinu si parla catalanu. A lingua a più sparta hè benintesa u sardu in rossu annantu à a carta. À u sud ci hè una minurità linguistica ligura culurita in verdi. U sardu ùn s’assumiglia tantu à u corsu, o à u talianu puri essendu una lingua latina.
Chi n’hè oghji di a pratica ? Puri s’eddu si senti di più u sardu in i carrughji sardi ch’è u corsu in Corsica, u modu di campà incù dui lingui prisenti annantu à un solu logu hè un pocu u listessu.
Ricunniscenza ufficiali
I tistimughjanzi racolti mostrani chÌ a trasmissioni ùn hè più quidda. Par avà una ricunniscenza ufficiali di u sardu da u statu talianu ùn ci n’hè. A nova maghjurità di centru manca stallata dipoi aprili à u parlamentu rigiunali si mostra in favori à un prughjettu di sviluppu. Da fà un manca.
I sciffri ufficiali di a righjoni Sardegna mintuveghjani 1 200 000 parsoni chì parlani u sardu. Bon parechji chì sò andati à circà u travagliu fora di l’isula campani in italia o puri ancu à u stragneru.
U riportu di Dominique Moret è Stéphane Lapera :
