Ind’a so edizione di mercuri, tratta u ghjurnale Corse Matin d’un raportu resu di ferraghju da a corte di i conti (ducumentu d’80 pagine dispunibile à a fine di l’articulu).
Analizeghja u ducumentu u funziunamentu è l’utilisazione di u PEI (Prugramma Eccezziunale d’Invistimentu) fattu in lu 2002.
U pianu d’1.9 miliarde d’eurò hè statu creatu da aiutà a Corsica à campà cu e so specifità naturale isulane, è per falla finita cù u so ritardu per ciò chì tocca à i servizii cullettivi.
Una misura impurtantissimu, ma per a Corte di i conti l’affare ùn hè micca viaghjatu cum’ella ci vulia.
Pianu eccezziunale, adopru banalizatu
Sicondu u raportu di a giuredizzione finanziaria, i soldi di u PEI ùn sò micca stati aduprati solu per investimenti à scopu strutturente cum’ella era privista ind’u prugramma.A Corte di i conti a dice, u pianu hè statu utilizatu in cumplementu d’astri finanziamentu per prughjetti numerosi. Vale à dì ch’ellu hè statu banalizatu. Affare stranu per un prugramma dettu « eccezziunale ».
Un ritardu mai richjappatu
U raportu dice dinù chì parechji duminii sò stati tralasciati. Dop’à 15 anni di prugramma, i risultati ùn sò micca quelli chì eranu aspittati per esempiu per ciò chì tocca à e strade, l’aeruporti, a salute è dinù u sviluppu di u portu di Bastia.E riescite di stu pianu sò poche, ma ci n’hè quantunque. Ghjè u casu di a furmazione prufezziunale, l’acqua, u sviluppu di l’internu è l’agricultura. Ma pare chì i soldi di stu santu PEI ùn sò micca stati aduprati cum’ella ci vulia, è simu belli luntani di u risultatu vulsutu à a so criazione.
Un raportu chì duveria esse mintuvatu stu ghjovi per l’ultima sessione di l’assemblea di Corsica nanz’à e vacanze. Postu u gruppu « Le rassemblement » ferà una muzione da dibatte nant’à u ducumentu.
Da ramintà chì durante a so visita in Corsica u 4 Lugliu scorsu, u primu ministru Manuel Valls hà firmata a quarta parte di u PEI d’un prezzu di 471 millioni d’eurò.
Observations définitives : Les aides publiques aux investissements en Corse, partie 01
Observations définitives : Les aides publiques aux investissements en Corse, partie 02
