Certains élèves de classes bilingues ont tous leurs cours en français en ce moment dans le Finistère, faute de remplaçants brittophones. Leurs parents ont manifesté à Quimper pour demander au Rectorat de recruter. Ne vefe ket skolaerien brezhoneger a-walc'h evit erlec'hiañ ar re a zo klañv. Skolidi meur a glas diyezhek o deus ranket heuliañ kentelioù e galleg penn da benn. Goulenn a ra ar gerent hag ar gevredigezh Div Yezh respontoù sirius digant Rektordi akademiezh Roazhon.
Un emgann sifroù eo, a glever bep bloaz da vare an distro-skol : mankout a rafe skolaerien brezhoneger hervez ar gevredigezh kerent Div yezh, a stroll tadoù ha mammoù skolidi ar c'hlasoù diyezhek publik. Er c'hontrol, Rektordi akademiezh Roazhon a embann ez eus ur skolaer e pep klas.
Er mare-mañ, avat, e seblant an holl bezañ a-du : mankoù a zo e meur a lec'h. Renerezh an Ensellerezh akademiezh Penn-ar-Bed, e Kemper, ne gav ket skolaerien divyezhek da erlec'hiañ ar re a zo klañv. Meur a wech eo deuet kerent ha bugale skolioù Douarnenez, Ploveur pe c'hoazh Pleiben da vanifestiñ, hep disoc'h evit ar poent.
E meur a glas divyezhek e Penn-ar-Bed e vez neuze kelennet e galleg penn-da-benn er mare-mañ.
Skolaerien prest da cheñch akademiezh
Koulskoude ez eus tud prest da labourat e brezhoneg. Meur a skolaer, stummet ha titlet e akademiezhioù-all, o deus desket ar yezh met ne vezont ket lezet da vont kuit gant o rannvro orin. Hag aon o deus bremañ da goll ar pezh o deus desket.
N'omp ket deuet a-benn da gaout respontoù digant ar Rektordi war an danvez-se.
