Raktres-lezenn Paul Molac war ar yezhoù : an tabutoù war-eeun

Adalek 9 eur, diriaou 8 a viz Ebrel, e vo kinnig-lezenn Paul Molac war ar yezhoù dirak kambr ar gannaded. Gortozet-tre eo an destenn-se gant difennerien yezhoù Frañs. Evit bezañ kadarnaet e ranko bezañ votet gant ar Vodadenn vroadel dres evel ma oa bet gant ar Sened e miz Kerzu 2020.

Spi zo gant ar c'hannad da gendrec'hiñ ar gannaded-all.
Spi zo gant ar c'hannad da gendrec'hiñ ar gannaded-all. © Thomas Padilla/MAXPPP

"Fiziañs ‘m eus e c’hello an destenn bezañ votet gant ar gannaded ha kadarnaet, eme Paul Molac. Aet eo ar speredoù war-raok abaoe ma c’hinnig lezenn kentañ e 2015. Met labour pedagogiezh a zo da gas da benn c’hoazh gant ma c’heneiled."

Pevar fennad, enno meur a rannbennadoù, a chom e testenn ar c’hannad diwar ar seizh a oa evit al lennadenn gentañ, e miz C’hwevrer 2020. Er Vodadenn vroadel e oa bet lemmet kuit ar braz eus an destenn, dreist-holl ar pennadoù a denne d’ar c’helenn. Lod diouto a zo bet ouzhpennet en-dro gant ar Sened e miz Kerzu 2020. Spi zo bremañ gant Paul Molac ha gant an difennerien e vo votet an destenn evel m'emañ.

Ar c'helenn, mil a-bouez 

Evit ar c'hannad eo a-bouez bras e vefe votet estreget ar melladoù a denn d'ar glad. "Ma ne vez ket kaset war-raok ar c'helenn, ne vo ket posubl saveteiñ hor yezhoù", a gendalc'h Paul Molac. Setu perak e klasko lakaat da votiñ en-dro ar mellad a redife an tiez-kêr da baeañ ar skodenn-skol d'ar skolioù kevredigezhel evel Diwan pe Seaska, evit kement bugel a zibab mont d'ar skol en ur gumun-all. Bountañ a raio ivez evit ma vefe aotreet an hentennoù kelenn dre soubidigezh er skolioù publik ha kinniget ar c'helenn divyezhek d'an holl familhoù o deus c'hoant. "E Breizh ez eus 7% hepken eus ar skolidi o teskiñ brezhoneg. Padal, hervez ur sontadeg, e vefe ar c'hoant-se gant 40% eus ar familhoù. Ret eo respont d'ar goulenn-se." 

An tabutoù a c’heller heuliañ amañ, war-eeun war lec’hienn internet ar vodadenn vroadel.

Gant dilennidi ar brasañ niver, baleerien LREM, e vez rebechet da gannad ar Morbihan bezañ dibabet skrivañ an destenn e unan, ha kinnig anezhi e anv e strollad Frankizoù ha tiriadoù, hep bezañ labouret gant ar gouarnamant hag Ministrerezh an Deskadurezh-Stad da skouer. Dibosubl e oa hervez kannad Ploermael, evel ma zispleg deomp er video-mañ.

Abaoe meur a sizhunvezh emañ ar c’hevredigezhioù a zifenn ar yezhoù o klask kendrec’hiñ ar gannaded da votiñ a-unan gant Paul Molac ha da skrivañ el lezenn ar gwir da gelenn dre soubidigezh, da skouer. Respontoù an dilennidi a gaver war ar gartenn da heul :

https://padlet.com/elternbilinguisme/nqgc993dmle7r0ai?fbclid=IwAR1IubJgWBe-vj_M7Mh3LzkeziZ_ctZYLL_v60HmF1fld5FMwbnBmVh6PB8

Ma vez kadarnaet ar raktres-lezenn e rankfe ivez ar sinoù diakritek evel an dildenn (~) bezañ aotreet e servijoù marilh ar boblañs. Peadra da vroudañ familhoù e-leizh da reiñ an anv Fañch d’o bugale.

Poursuivre votre lecture sur ces sujets
culture bretonne culture culture régionale politique