• FAITS DIVERS
  • SOCIÉTÉ
  • ECONOMIE
  • POLITIQUE
  • CULTURE
  • SPORT

Neknomination : bichjeri pieni è capi vioti

Neknomination, un "ghjocu" murtale ch'hè scalatu in Corsica dinù. / © FRANCK PERRY / AFP
Neknomination, un "ghjocu" murtale ch'hè scalatu in Corsica dinù. / © FRANCK PERRY / AFP

L’affare face u buzz dapoi a settimana scorsa.  E "Neknominations" scalanu in Corsica dinù. Ogni ghjornu in u mondu sanu sò millioni di ghjovani chì si filmanu viutendu d’un colpu un bichjeru d’alcool. Un “ghjocu” chì hà dighjà fattu parechji morti. 

Par Pierre Simonpoli publicatu da Sébastien Tieri

Hà annacquatu facebook in pocu tempu. Ancu s’elle parenu belle luntane e sponde australiane, sò stati numerosi i ghjovani Corsi à sparte issu fenomenu. Certi affari sò universali, a niscentria per esempiu.

Sò sbarcate in Corsica e neknuminazione (di l’inglese neck your drink) più prestu chì i turisti d’estate. Hè subbitu subbitu duvintatu u « ghjocu » à a moda nant’à a reta corsa. A quandu mai !

Regule simplice per simpliciotti

Viutà un bichjeru d’un colpu è dumandà à trè persone di fà u listessu affare in u ghjornu chì seguiteghja, sò cusì dette "numinate". Eccu e regule d’issu ghjocu di gran’ghjudiziu, è viaghja cù i so pedi chì l’azzione deve esse filmata. 


Fà u buzz finu à a morte ? ​

U scopu ? Si cerca sempre. Fà u buzz forse? 
A chì si vole viutà una buttiglia, a chì prova à beie l’alcool u più putente, seranu pronti à nimporta chè l’internauti per avè u più di like pussibile ?

A u principiu era forse per amusassi ma si sò annegriti l’affari a simana scorsa. Sò morti dui ghjovani irlandesi per via d’una neknuminazione : U ghjocu ùn hè più ghjocu.

A ogni sbatichezza a so risposta intelligente

Piglià un altru versu fendu una bona azzione. Eccu ciò ch’elli provanu à fà parechji internauti dapoi qualchì ghjornu. Un abitante di Bordeaux hè duvintatu famosu grazia à a so invenzione « a smartnomination » .

U cuncettu : cumprà robba da manghjà, rigalà la à un SDF è dumandà à trè personne di fà u listess’affare. A so video hà fattu u buzz è hè stata sustenuta da millaie di personne.



In Corsica dinù omu hà pruvatu à dà una andatura cerbelluta  à u ghjocu australianu. Nant’à Facebook a sterpa di i Kongoni si sò ghjuvati di e neknuminazione per a difesa di a lingua Corsa  .

Hè statu seguitatu l’affare .Trà quelli chì dicenu duie parolle,quelli chì cantanu è quelli chì facenu parlà u so ghjacaru , facebook hè duvintatu un locu di chjami è rispondi.
Allora hè sicura, ùn hè micca què chì salverà a lingua corsa ma l’affare averà quantunque riesciutu à annegà u fenomenu iniziale di e Neknuminazione.

Sur le même sujet

Ajaccio : reconstitution de la bataille d'Austerlitz au Casone

Les + Lus