Di poi luni dui’omi Antoine Santoni 47 anni è Cedric Pieri 29 anni cumpariscenu liberi davanti à a Corte d’assisi di Parigi per l’assassiniu u 5 di ghjugnu di lu 2008 di Michel Majhoubi-Bastiani un prufessore è ristoradore bastiacciu, un assassiniu chì saria in lea incù u racket.
In prima instanza i dui omi eranu stati assolti da a Corte d’assisi di Bastia ma u Ministeru publicu ha fattu appellu è ottenutu l’inviu di u cartulare nantu à u cuntinente dinunziendu dubbiti di pressione nantu à i ghjurati, un fattu sempre negatu da a difesa chi in Parigi ghjè vinuta à circà l’assuluzione.
Oghè a questione chì si pone ghjè perchè Michel Majhoubi gerante di u « White » hè statu tombu durante l’estate di lu 2008 ?
Primu ghjornu di prucessu : a difesa core apressu una seconda assoluzione
Luni a mamma di a vittima Marie-Josée Bastiani ghjera sola per raprisentà a memoria di u so figliolu, cun ella u solu avucatu di a parte civile Pascal Garbarini.
Una situazione chì cuntrastava cù quella di l’accusatu Antoine Santoni, i so amichi ghjerannu vinuti per sustene à quellu ch’elli chjamanu u so « pilastru ». L’omu chì s’hè sempre dettu nucente s’hè prisintatu davanti à a Corte depressivu, saria u casu dipoi u so imprigionamentu. Durante l’audienza ha evucatu i trattamenti chì li so stati dati in prigiò per tene. Medicine forte chi u facianu dorme è chi l’annu messu ind’un statu di « legume », diciarà ancu : « Aghju toccu u fondu ». Durante u rappellu di i fatti si hè ancu addurmintatu.
Cédric Pieri, ellu, prisintatu in prima instanza cume un giovanu debule si hè affacatu oghje più assicuratu. Secondu e so parole, l’omu chì avà ghjè babbu di famiglia si hè sirvutu di a prigiò per « avanzà ». I so trè anni d’incarcerazione provisoria l’anu sirvutu à passà u so brevettu è u so baccu, per à a so surtita sfurzassi d’avè una vita stabile. Si hè traslucatu in Bastia per esse vicinu à u so figliolu. Luni sò l’argumenti di Cedric Pieri chì so stati studiati da a Corte, l’argumenti ch’anu messu Antoine Santoni in causa in st’affare.
L’inchiestadore principale ghjè statu interrugatu nantu à l’elementi à carica è anzituttu nantu à i vistiti d’Antoine Santoni ritruvati brusgiati inda machja. Cù l’inchiestadore principale a Presidente s’hè attardata assai, sopratuttu nantu à e circunstanze di « racket » patite da a vittima. Alain Guy l’inchiestadore tene a so cunvinzione Michel Majhoubi ghjera un cummerciante perseguitatu da a maffia è i dui accusati sò culpevule.
Secondu ghjornu di prucessu : un’inchiesta « debule »
Marti u 25 di ferraghju, e debulezze di l’inchiesta sò state messe in davanti. Cù un esempiu maiò, l’assenza di sangue nantu à a strada induve Michel Majhoubi saria statu tombu. St’elementi sò utilizzati da l’avucati di a difesa Eric Dupont-Moretti è Jean-Michel Albertini per sfà a versione accusatoria di Cedric Pieri. Tandu inda salla d’audienza ci sò state e tensione tra e partite.
A difesa cerca di fà turnà a Corte versu a versione di culpevuli ch’ellu ci vularia à circà indu gruppu autore di racket. Pascal Garbarini ellu ha vulsutu mette fine à l’imagine di l’inchiesta debule, evuchendu u fattu chì cedric Pieri era bè nantu à u locu di l’assassiniu, ùn frinquintava micca u gruppu ch’avia fattu racket à a vittima, allora perchè l’avaria accumpagnati sta sera di ghjugnu di lu 2008? Per l’avucatu di a partita civile tuttu gira intornu à Antoine Santoni è Cédric Pieri.
Una mamma à l'addisperu è in cerca di risposte
A Corte si dumanda ancu sì Cedric Pieri un’avaria micca negatu nantu à certi punti per minimizà u so postu d’abbucunatu. A mamma di Michel Majhoubi ella s’hè adirizzata à a Corte per parlà di u so figliolu, di a so persunalità, ma ancu di l’acquistu di u « White », di u contestu di minacce è di pressione è sopratuttu di l’arrivu di « Tony » in giru à u so figliolu vale à dì Antoine Santoni.U dopu meziornu Jean-Vicent Fuentes un amicu di a vittima ghjè statu intesu, ha dichjaratu chì u ghjornu di l’assassiniu Michel Majhoubi avia appuntamentu cù a pulizza. Oghje ghjè Cedric Pieri chì sarà intesu da a corte per dà a so versione, quella chì dà Antoine Santoni nucente.
A vittima era stata ritruvata ind’un travu di a cummuna d’Olmeta di Tuda culpitu di tre palle.
Stu mercuri 26 serà interrogatu Cedric Pieri da a Corte d'assise.
« U White : racket è viulenze »
Michel Majhoubi pruprietariu di u White nantu à u portu di Toga in Bastia, saria statu toccu di poi lu 2005 di viulenze, attentati e pressione in lea cù u successu di u so affare. In lu 2006 una carica splosiva avia tuttu annientatu.U gerante di u White era a vittima di storsione di fondi da a parte d’un gruppu à u quale avaria appartinutu Antoine Santoni. Per altru, per à mamma di a vittima Marie-Josée Bastiani, u so figliolu saria statu viulintatu da Cédric Pieri.
Ma secondu Cédric Pieri stu racket si spiegava da una dumanda di prutezione fatta da a vittima. Antoine Santoni, ellu, saria statu interessatu da a gerenze di u « White » è avaria circatu à pigliassi i soldi di l’assicuranza dopu à a destruzione di u stabilimentu.
