Pocu fà u serviziu di videò à a dumanda di u putentissimu Amazon hà prupostu a traduzzione in sottu tituli di a nova stagione di a seria Jack Ryan in lingua corsa.
Un iniziativa rimarcata da i twittaghjoli nustrali.
Jack Ryan spezialistu di a CIA, trà bombe è attentati hà da pruvà à spiantà una rete di terroristi. Strascinatu trà i so spaventi di tandu quand'ellu era ind'è i Marines in Afghanistan è u so stintu di boy-scout, li tuccarà à fà valè tutte e so cumpetenze per fà piantà u so nemicu Suleiman, un terroristu islamistu chì vole vendicà a so famiglia.
Eccu un riasuntu bellu scucinatu à l'usu americanu, chì ferà sunnià tutti passiunati di filmi d'azzione in fondu à u Taravu. È puru, oghje hè prupostu in lingua corsa.
Mentre un tweet, Amazon Prime hà fattu sapè chì a stagione nova di issu "capi d'opera" serà sottu titulatu in corsu per u più grande piacè di i twittaghjoli nustrali sempre di più in brama.
Les corses, on vous aime au moins autant que vous aimez votre région, et on vous le prouve : retrouvez la bande-annonce de #JackRyan Saison2, maintenant sous-titrée en corse ! pic.twitter.com/IESYfDs3CH
— Prime Video France (@PrimeVideoFR) October 22, 2019
In stu duminiu, u grande Amazon Prime cuncurente direttu di Netflix insolca a via per a promuzione di u corsu.
