Orezza : i paisani à prò d'un anticu casellu

A mez'à a pieve orezzinca, eccu un iniziativa da scopre.
Sò unipochi di paisani di u circondu ch'anu decisu d'ùn lascià corre un locu anzianu : u casellu di u "rispettu".

U sole ùn hè ancu pisatu cumplettamente nant'à a pieve d'orezza ma hè digià ora di piglià a strada.
Sta mane quì, i paisani di u circondu anu previstu di fà cinque chilometri pè cullà in u locu dettu di i compuli, nant'à a cumuna di a Parata d'Orezza.
A chì colla à pedi, à chì colla cù e mule : a cullata si face pianu pianinu.
 

Rialzà u casellu

U scopu d'issa ghjurnata hè bellu simplice : dà un fiatu novu à una vechja casa chjamata casellu di u rispettu, è fà nasce accant'à ella un agrottu pè pudè dorme.

"Avà femu i nostri tufoni è dopu metteremu u cimente nentru. Cum'è a facianu i nostri vechji, qualchosa pruveremu à fà !"

ci spiega Jean-Jacques Emmanuelli, paisanu di e Piazzole, venutu à aiutà.

Ma in verità sò parechji mesi chì i travaglii anu cumminciatu.
U casellu di u rispettu si n'era fallatu è ci hè vulsutu tempu pè rialzà lu.
Cù l'aiutu dinù di a meria di a Parata d'Orezza ch'hà pagatu i viaghji in elicotteru da pudè cullà u materiale, l'affare cummencia à viaghjà.

François Emmanuelli ci face visità i lochi :

"Avemu rifattu u muru di u casellu, è ancu u tettu. Ma se ùn la femu micca noi, qual'hè chì l'hà da fà ?" .

   

A canzona di u casellu

Dop'à u travagliu, mumentu di spartera.

Ribombanu i canti, è sopratuttu unu, chì tratta di u casellu direttamente, scrittu pè ramintà ch'à u seculu passatu, issi lochi eranu vivi.
U casellu era digià arritu, è i pastori orezzinchi numerosi assai.

Amatu Leoni, paisanu di a Parata d'Orezza, l'hà sempre in memoria.
 

"Ghjera un locu induve si facia u casgiu, induve venianu à dorme i pastori di u rughjone".

I travaglii cuntinueghjanu sopr'à locu guasi ogni settimana, è pudete seguità u so sviluppu nant'à a pagina Facebook di u casellu.
 


Da fà chì issu vechju casellu supraneghji per u sempre a pieve d'Orezza.


Riportu sanu quì :