In muntagna a neve hè poca, ma i corsi ci battenu quantunque

Publié le Mis à jour le

S’è omu fideghja e rete suciale, compia a dumenicata , viderà spessu ritratti d’amichi è di tant’altri andati à spassu per ste muntagne. E cime è l’attività spurtive piacenu di più in più ma quist’annu a neve manca è i prufeziunali sò dilusi.

Annu, u Covid hà purtatu parechji corsi passiunati di i sport d’hiver, à pruvà st’attività in i so lochi. Secondu à Guillaume Ferreri, hè statu un successu tremendu, è l’isulani anu ancu scupertu nove pratiche cum’è « u skì di rando è e rachette ». E dumande ci eranu quist’annu dinù ma in stu principu di u 2022, per ‘sse muntagne a neve hè poca è a situazione ùn hà più nunda à chi vede.

Solu 15cm

A stagione avia principiatu bè, a neve era falata di Dicembre nantu à parechje cime ma u bellu tempu hè vultatu di Ghjennaghju. I primi tocchi sò stati i prufeziunali, cum’è Guillaume Ferreri, guidu d’alta muntagna, ch’avia previstu di fà duie Alta Strada in skì di rando. « ghjè un itinerariu longu di sette ghjorni trà Ese è Ascu ma simu stati ubligati d’annulà ». I servizii di meteo France appoghjanu u custatu di u guida.

Per un mese di ghjenaghju manca assai neve in muntagna per esempiu nantu a à Maniccia di regula di sti tempi ci hè 1,40 di neva, quist’annu solu 62 centimetri. Listessu affare in Ghisoni, solu 15cm allora chì annu ci n’era piu 60. L’acqua è u ventu anu fattu parte a neva è ciò chì ferma hè diventatu tuttu codru.   Ma ghjustamente anu pussutu addattati si, ch’in Corsica ancu cù poca neve, a muntagna hè un grande terrenu di ghjocu. S’ellu ùn si pò fà skì, si pò sempre attippà cù piulette è scarponi.

Per i passiunati ci hè di chè fà « emu una stagione magnifica per fà i cramponi , a neve hè assai dura è ci hè assai lochi cudrati bè chì ci permettenu di fà l’alpinisimu, ma per quessa ci vole chì a ghjente sia digià avvezza. ».

Ricchezza

Al di là di u spurtivu, e cunsequenze sò dinù ecunomiche, di pettu à annu, u ritimu ùn hè manc’appena u listessu, l’attività hè callata di metà. « Annu surtiamu cinque ghjorni à simana, oghje più chè dui o trè ». St’inguernu, senza neve, face ch’ùn si pò mancu risponde à un marcatu forte :   « Ci sò parechje dumande di ghjente d’altrò dinù per vene à praticà u skì di rando in Corsica settimane sane. A Corsica hè una vera destinazione per a neve. » 

Quandu serà passatu u covid, ci vulerà à vede

Christophe Gandon

Sta mancanza di neve tocca ancu d’altri duminii, in Bastelica per esempiu, ci sò assai cummerci chì sò aperti d’inguernu. U pianu d’Ese porta assai mondu ogni dumenicata, inde l’hotel, l’osterie è i caffè. Per Christophe Gandon, a neve hè una ricchezza, ma quist’annu ancu senza, certi venenu à passà si una stonda. « Quandu Ese hè apertu ci face un’ecunumia tamanta, avemu a dumanda per u venneri è u sabbatu, ma ancu avà chì ci hè pocu neve, collanu à piglià l’aria ».  

Usteriaghju dapoi 12 anni, Christophe Gandon, vole crede à un turisimu durevule inde e muntagne, chì certe volte u mondu ci hè « Sta dumenicata, l’ottu stanze eranu pigliate ». Bella sicura, ghjè quandu ci hè a neve ch’ellu ci hè u più mondu in Bastelica, ma dapoi annu è a crisa sanitaria, un picculu turisimu lucale s’hè sviluppatu, ma cum’ellu dice Christophe :  « quandu serà passatu u covid, ci vulerà à vede » !

In sta fine di Ghjennaghju, i prufeziunali, da Bastelica à Ascu passendu per Ghisoni, speranu avè torna appena di neve per compie a stagione cum’ellu ci vole.