La Corse compte environ 2 200 licenciés de pétanque. Un chiffre qui n'évolue pas malgré plusieurs compétitions insulaires et un nombre conséquent de passionnés.
E cumpetizione naziunale è internaziunale di bucce sò state una riescita quist'annu per e squadre corse è per l'urganizadori di i cuncorsi. In l'Isula, l'internaziunale u Paoli cuntava 360 squadre cù una vittoria di ghjucadori corsi. In Aiacciu eranu 256 squadre à battaglià sta dumenicata, cù una vittoria per u club "Ajaccio Sport Pétanque".
Sì i risultati sò bunissimi à u filu di l'anni, e licenze elle ùn crescenu. A corsica conta à pocu pressu 2 200 licenze. Un sciffru chì ùn hè tantu impurtante quand'omu vede a ghjente chì ghjoca à bucce in carrughju o in i caffè. Si tratta piuttostu d'una attività di piacè chè di cumpetizione. Secondu à u presidente di u cumitatu regiunale di Corsica Lino Di Franco ci vole una vera amparera di sta disciplina in Corsica soprattuttu per a giuventù : " Ci volenu i prugetti per i giovani. Ci vole à andà in e scole publiche per fà cunnosce stu sportu è ci vole à creà scole di bucce per avè unepochi di zitelli passiunati. Oghje travagliemu cù una centina di zitelli in tutta a Corsica, u scopu hè di duppià stu sciffru per l'anni à vene. S'è no cuntinuemu à travaglià, incù forza, ci emu da ghjunghje".
Un calendariu più adattatu
A stagione di e bucce si face durante l'annata civile cù una piantata à u mese d'aostu per lascià a piazza à parechji cuncorsi senza licenza è ripiglia di settembre. Secondu à u presidente di u club Ajaccio Sport Pétanque, Jean-Philippe Santucci ci vole à accuncià u calendariu : "A stagione principia di ghjennaghju è compie di dicembre, u prublema hè chì ci hè una piantata di e cumpetizione licenziate à u mese d'aostu ciò chì face chì a ripresa hè difficiule. Ci volerebbi à fà una stagione da settembre à ghjugnu".
Per Jean-Philippe Santucci, ci volerebbi dinù à mudificà certi termi di a cumpetizione cum'è creà forse parechji cuncorsi di livellu sfarente per ridinamizà stu sportu è fà ghjunghje di più ghjente.
Un costu impurtante è pochi mezi
I cuncorsi di bucce raprisentanu dinù un costu per tutti i ghjucadori soprattuttu per i spiazzamenti. Sì i prezzi per i vincidori ponu esse belli cum'è per esempiu quellu di l'internaziunale d'Aiacciu cù 4500 euri à spartesi in trè, ci vole dunque à ottene un risulatu importante per avè una rimunerazione ancu sì parechji cuncorsi pacanu à partasi da l'ottesimi di finale.
Cù u tempu, a fiura di a buccia hè scambiata in bè, l'attività hè più mediatizata oghje è seguitata assai.
E partite filmate sò di più in più numerose, cum'è no l'avemu pruposta per sta finale di l'internaziunale d'Aiacciu
Ma senza diritti TV nè statutu prufeziunale ufficiale u sportu hà u so chì fà à evuluà è piglià un'andatura di primura di pettu à l'astre discipline.
