Purtivechju : l’ora di u ritornu pà u fistivali Scen’è sonniu

Criatu vint’anni fà da a cumpagnia I Chjachjaroni, u fistivali Scen’è sonniu si passa in Purtivechju da u 22 à u 26 di sittembri. Cinqui ghjorni di spittaculu vivu incù numarosi riprisintazioni teatrali.

Scene’è sonniu hè di ritornu in Purtivechju. Sì, l’annu scorsu, colpu à u covid, ùn era micca statu pussibuli d’urganizà u fistivali criatu da l'associu I Chjachjaroni, l’affari hè avà sfarenti.

Da u 22 à u 26 di sittembri, una decina di cumpagnii teatrali è una sessantina d’artisti sarani in scena pà a vintesima edizioni. "Nurmalmente, a vintesima edizioni duvia esse urganizata l’annu scorsu, ci spiega Jean-François Perrone, membru storicu di I Chjachjaroni. Mà eramu in pienu cunfinamentu è ùn emu micca pussutu falla. Dunque, l’emu ripurtata d’un annu. È dopu, in aprili dinò, ùn era micca pussibuli di falla."

A merria di Purtivechju è a Cullettività di Corsica ci ani dumandatu sì pudiamu fà u fistivali di sittembri

Jean-François Perrone, attori è membru di I Chjachjaroni

Eccu a raghjoni parchi u fistivali si passa di sittembri è micca d’aprili, com’è d’abitudina. "A merria di Purtivechju è a Cullettività di Corsica ci ani dumandatu sì pudiamu fallu di sittembri, dici Jean-François Perrone. Pà no, nurmalmenti, hè u mese di i nosci vacanzi ; si finisce a stada, induve ghjucchemu sei volti à settimana. È dopu, ripiddemu i corsi à u principiu d’ottobre. Mà ci semu arranghjati trè no pà urganizalu avà."

Dui ghjorni in i scoli

À partesi da u marcuri chì veni, i primi spittaculi pà i ziteddi si ghjucherani in u quartieru pupulari di Pifano. Una manera di ramintà chi l’urganizatori ani sempri vulsutu apra Scen'è sonniu à tuttu u mondu. "T’emu un cuntrattu incù à Cità di Purtivechju è cu u statu francese pà u sviluppu di u teatru, di u circulu è di u sinemà ind’u quartieru di Pifano, induva c’hè dinò a mediateca, incalca Jean-François Perrone. Vulemu sviluppà è apra a cultura à tutti è ancu à u restu di a cità."

U ghjovi è u vennari, i riprisintazioni sarani soli pà i sculari. "Tutti i scoli di Purti-Vechju t’ani dui spittaculi pà ghjornu. L’apartura à u gran publicu si farà u vennari à partesi di 5 ore." Scen'è sonniu hè una manifistazioni gratuita in tuttu. Com'è pà tutti l'evinimenti cultrurali, u pass sanitariu hè ubligatoriu.

Una pezza particulari

Torna colpu à a crisa sanitaria, quist'annu, un ci sarani micca spittaculi in u centru di a cità. Tutti i riprisintazioni si passarani à "L’usine à liège", accant’à u portu.

Trà i sfarenti pezzi di teatru, quidda scritta da Marjolaine Larranaga hè un pocu particulari pà Jean-François Perrone. "Marjolaine era a mo prima eleva quand’aghju cuminciatu à dà i corsi di teatru, quì, in Purtivechju. Hè un’anziana membra di i Chjachjaroni chi hè partuta à travaddà quindici anni ind’è Mnouchhkine, in Parighji. Hà fattu a so propia cumpagnia è hà scrittu ‘ssu spittaculu idda stessa. Hà fattu una pezza annant’à u so fiddolu, chi t’hà a malatia di Dravet. Hè una malatia rara. Hè una vera pezza di teatru chi pò cummova a ghjenti."

A pezza si chjama "Le don d’Isis". Sarà ghjucata vennari sera da a cumpagnia La Barque Ailée.

Eccu una bedda manera d’apra un fistivali chi faci sunnià ogni annu guasgi 6.000 parsoni dipoi u 2001.

Poursuivre votre lecture sur ces sujets
culture théâtre festival événements sorties et loisirs