Si n’hè andatu Petru Guelfucci

U famosu cantadori di Sermanu s’hè spentu stu vennari à 66 anni. Attori maiò di u Riacquistu è membru fundatori di u gruppu Canta u populu corsu, s’era ancu battutu pà fà ricunnoscia a paghjella à u patrimoniu culturali di l’Unesco.

Una voci s’hè spenta. Tercanu di a canzona corsa, Petru Guelfucci hè mortu stu vennari, l'ottu d'uttrovi à l’età di 66 anni. Dapoi qualchì mese, u cantadori sermanacciu si battia contr’à a malatia.

Era u babbu di a cumidianti Stella Guelfucci è di Petru Santu Guelfucci, chì canta cù i Chjami Aghjalesi.

À l’albori di Canta u populu corsu

Natu in una famidda di cantadori è di musicanti buzinchi, Petru Guelfucci avia cuminciatu à cantà in a so zittiddina. In paesi, quand’era ghjuvanettu, animaia dighjà i veghji cù l’anziani.

In a Corsica sana, a so voci putenti era diventata famosa dapoi a leva di u sittanta. In u 1973, avia participatu à a criazioni di u gruppu Canta u populu corsu cù Ghjuvan’Paulu Poletti, Natale Luciani, Ceccè Buteau è d’altri.

A so storia cù Canta si firmarà in l’annu 1981, dopu à u famosu cuncertu in Parighji à u Théâtre de la Ville.

« Corsica », tamantu successu

Qualchì annu dopu, st’apicultori buzincu cumencia una carriera à l’assolu. In u 1987, esci « Isula », u so primu dischettu cù u titulu « Isula idea » chì cunnosci un veru successu.

A vera cunsacrazioni avveni in u 1991, cù a canzona « Corsica », annant’à una musica cumposta da Christophe Mac-Daniel. U dischettu epunimu francarà i cunfini di l’isula sin’à u Canada : culandi, più di 100.000 esimplarii sarani vinduti à u Quebec.

A canzona “Corsica” sarà dinò assai ripresa in altrò, ancu in Grecia.

Cantu in paghjella

Petru Guelfucci hà cantatu dinò cù i gruppi Les Nouvelles Polyphonies Corses è Voce di Corsica. Dui furmazioni cù quali avia vintu dui « Victoires de la musique » in u 1991 è in u 1995.

In a so longa carriera di cantadori, u Sermanacciu ùn s’hè mai firmatu di difenda a cultura corsa, è sopratuttu a paghjella. À u capu di l’associu « cantu in paghjella », s’hè battutu incù d’altri pà iscrivi a pulifunia nustrali à u patrimoniu culturali immateriali di l’Unesco in u 2009.

Una ricunniscenza eterna pà a paghjella. Un cantu tradiziunali chì Petru Guelfucci tinia caru. Cum’è a Corsica tinia caru a so voci miludiosa…

Poursuivre votre lecture sur ces sujets
culture patrimoine société centre corse