La Bretagne manque de professeurs des écoles bilingues, une nouvelle licence les y prépare à Brest. Mankout a ra mistri-skol divyezhek, setu ma 'z eo bet digoret un aotreegezh nevez da stummañ studierien yaouank.
E Frañs ez eus 48 aotreegezh a seurt-se, met n'ez eus nemet unan e rannvro Breizh hag e brezhoneg eo ! An aotreegezh PPPE (parcours préparatoire au professorat des écoles). Dre parcoursup e lakaer e anv ha digor eo d'an holl, brezhongerien pe get. Ul lodenn ar c'hentelioù, evit ar ouizhiegezhioù akademek, a vez dalc'het en Irwazh e Brest gant kelennerien hentenn divyezhek al lise. Kentelioù brezhoneg o devez ar studierien ivez, met er skol-veur ar wech-mañ, 5 eurvezh bep sizhun e bloavezh kentañ. Respont a ra d'un ezhomm e bed an deskadurezh e Breizh : 30 000 bugel a ranke bezañ skoliataet en hentennoù divyezhek hervez raktres ar rannvro, met n'eus ket nemet 20 000 hiziv an deiz. Berzh a ra ar stummadur PPPE dija, warlene o doa tost da 300 den lakaet o anv war parcoursup evit 25 plas kinniget.
Keleier-berr
Kenderc'hel a ra manifestadegoù al labourerien-douar ha liesseurtaat a ra an doareoù da stourm. Dec'h, e Kemper, o doa izili an FNSEA hag al labourerien-douar yaouank skuilhet 200 tonennad douar war an hent-tizh evit hadañ geot. Ar reolennoù war ar pradeier a zo unan ar re a c'houlennont simplaat pe zoken lemel. E fin an devezh e oa deuet rener an DDTM, servijoù ar stad evit an tiriadoù, da glask displegañ abegoù ar reolennoù-se. Goude-merenn e rankfe ar gouarnamant embann divizoù nevez evit respont d'al labourerien-douar kounnaret abaoe eizhteiz.
Livadurioù Anna Boch vez staget ouzh mogerioù mirdi Pont-Aven en devezhioù-mañ. An arzourez a vro Beljik, beajourez ha dastumerez zo unan eus harozed an impresionouriezh, lidet ganti he 150 vloaz bloaz-mañ. Kevelet gant mirdi Ostende e Bro Beljik vez dizoloet gant an diskouezadeg buhez ur vaouez modern, merket ganti fin an 19 vet ha penn-kentañ an 20 vet kantved. He doare da livañ zo bet awennet gant livourien dre boentigoù giz Paul Signac ha Jean Seurat. Div wech eo deuet Anna Boch e Breizh. Livet he deus ar maezioù hag ivez maouezed o labourat : pesketourezed ha kouerezed en o zouez. Ganti eo bet prenet taolenn nemeti Van Gogh bet gwerzet gantañ en e vev. Breur Anna Boch vez gwelet war al livadur bet prestet a-ratozh-kaer gant mirdi Orsay. Digor vo an diskouezadeg adalek disadorn.
