Pascal Lamour est électro-shaman et aussi écrivain. Il consacre son dernier livre aux forces des mégalithes bretons. Ul levr nevez war mein-veur Breizh zo o paouez dont maez. Gant an elektro-shaman Pascal Lamour eo bet savet.
Brudet eo Breizh evit he mein-veur. E Karnag evel just, met e pep lec’h e kaver peulvanoù ha taolioù-mein. A-viskoaz eo bet dedennet Pascal Lamour ganto. Bamet e vez gant nerzh ha galloud ar roc’h. Emañ ar muzisian o paouez skrivañ « Mégalithes de Bretagne » asambles gant Joëlle Chautems. Ennañ e kaver un dibab a 50 maen-meur strewet un tamm pep lec'h barzh 5 departamant Breizh. Gant Favre eo bet embannet ar sturlevr.
Keleier-berr
Komite bleiz Penn-ar-Bed zo bet dalc'het dec'h er Faou. Ur bleiz nemetken zo en departamant sañset, gwelet oa bet vit ar wech kentañ e miz mae 2022. Diaboue, 26 dagadenn zo da damall dezhañ hag 50 loen zo bet lazhet. Digollet eo bet, pe e vo, ar saverien. Ma 'z eo bet aotreet e departamantoù 'zo tennañ war ar bleizi, n'eo ket bet asantet kement-se e Penn-ar-Bed. Goulennet vez kentoc'h d'ar saverien rannañ an douaroù gant ar bleiz. 'Benn fin ar bloaz vo kinniget ur steuñv nevez gant komite bleiz an departamant.
Aliesoc'h e komzer eus yec'hed ar c'horf eget hini ar speredoù. Setu perak vez aozet bep bloaz sizhunvezhioù ar yec'hed psikologel. Kroget eo ar 34 abadenn abaoe dec'h ha padout a raio betek an 22 a viz here. Prezegennoù, eskemmoù, pezhioù-choari hag a bep seurt zo aozet evit sachañ evezh pep hini ac'hanomp war an danvez-mañ. "Forzh peseurt oad e vefen, ur gwir eo yec'hed ma spered", setu tem ar bloaz-mañ.
E-pad bloavezhioù o deus ar vezhinerien awenet al livourien, deuet a-bell evit taolenniñ buhez ar vro. Ma 'z eo aet kuit Paul Gauguin, Emile Bernard ha Mathurin Méheut gant o marc'h koad eo chomet ar bezhin war ar reier hag un istor da zerc'hel soñj. André Cariou zo bet rener kozh mirdi arzoù-kaer Kemper. Ispisializet war skol Pont-Aven en deus bet c'hoant sevel ul levr : eus Kiberenn betek Rosko e vez tolpet ennañ 350 oberenn. Ur wir studiadenn war ur vicher start a zo bet a-bouez evit aodoù Breizh. Ur sell leun a garantez war an aour kistin.