Kenavo arzourien Breizh da Idir, kaner hag haroz Kabili

Aet eo Idir d'an anaon d'ar Sadorn 2 a viz Mae, e Pariz. 70 vloaz e oa an arzour. Kenlabouret en doa meur a wech gant arzourien evel Alan Stivell pe Gilles Servat. Ul liamm breudeuriezh a oa etrezo, emezo.
 
Meur a wech en deus Idir kanet war leurennoù Breizh, hag alies en deus lavaret e oa tomm e galon ouzh ar vro.
Meur a wech en deus Idir kanet war leurennoù Breizh, hag alies en deus lavaret e oa tomm e galon ouzh ar vro. © ALAIN JOCARD / AFP

"Idir ha me a zo bet evel breudeur, abaoe m'hor boa graet anaoudegezh". Setu penaos e komz Alan Stivell eus ar c'haner kabil, hollvrudet abaoe berzh bras ar ganaouenn A Vava Inouva, er bloavezhioù 1970. 

Kerkent hag embannet keloù e varv gant e familh en doa Alan Stivell embannet e dristidigezh war ar rouedadoù sokial, en ur skignañ ur video eus ar ganaouenn, enrollet e 1997 gant France 3 Breizh ha skignet en abadenn Du-mañ, Du-se.
   


Kontet en deus din en doa klevet er radio, en Aljeri, ma abadenn en Olympia, e 1972. Evel kalz tud eus e bobl en em sante Idir tost eus sonerezh Breizh, daoust ma ne gomprene ket ar c'homzoù. Lavaret en deus en doa gwelet, an devezh-se, e oa posubl reiñ sonerezh pobl da selaou.
Alan Stivell


Ul liamm diaes da zisplegañ etre Bretoned ha Berbered


Alies e teue Idir da Vreizh ha lavarout a rae en em sante tost eus sevenadur ar vro. Kanet en doa da skouer evit gouel 30 vloaz ar skolioù Diwan, e Karaez, e 2008. "Alies en em santer tost eus kulturioù minorelaet, eme Alan Stivell. Met etre ar Verbered hag ar Vretoned eo kreñvoc'h c'hoazh. Un dra bennak a santomp, hep gouzout re vat petra eo ar santimant-se."

Meur a wech en doa Idir pedet Alan Stivell da seniñ ha da ganañ gantañ war al leurenn, e Kemper, da skouer. "Souezhus e oa rak ne oa ket ur rock star, met n'en doa ket ezhomm d'ober kalz a dra evit plantañ tan en ur sal. Gant ar maouezed yaouank dreist-holl. Ne rae netra evit-se, ur galloud naturel en doa".

Gilles Servat pedet war ar bladenn Identités

Gilles Servat ivez en deus soñj da vezañ graet meur a sonadeg asambles gant Idir, e gouelioù-meur da skouer. "Glac'haret on. Dont a rae alies da Vreizh hag ul liamm kreñv en doa gant ar vro. Evidon, kaozeal gant tud evel Idir a zo bet un doare da gompren e stourme pobloù all evit o gwirioù, o sevenadur, o yezh. Da vont dreist d'hon stourmoù e Breizh."

Evit ar bladenn Identités, e 1999, en doa Gilles Servat lakaet pozioù e brezhoneg war ar ganaouenn Awah Awah, deuet da vezañ "A-walc'h, a-walc'h", e brezhoneg ."C'hoant en doa da zispakañ an div yezh kichen-ha-kichen. Evit diskouez al liamm kreñv etre Breizh ha Kabilia."

Idir, kan ar bed

A Vava Inouva ivez zo bet troet e brezhoneg. "Ma zadig-me" n'eo ket bet kanet gant Idir met gant Perynn Bleunven, evit ar bladenn-levr Kan ar Bed, embannet e 2018. An embanner, Bannoù-heol, en deus enoret ivez koun ar c'haner kabil, d'ar Sul 3 a viz Mae. "Asantet en doa Idir diouzhtu e vefe ur stumm e brezhoneg eus e don kaer-meurbet A Vava Inouva. Setu stumm Kan ar Bed kanet e brezhoneg gant Perynn hag e kabileg gant Karim Belkadi (eus ar strollad AmZik). Azasaet e oa bet ar c'homzoù orin gant Annaig Kervella. Ra vo skañv douar e vro evitañ. Kenavo er bed all Idir."
 
Poursuivre votre lecture sur ces sujets
culture bretonne culture culture régionale musique hommage société