Embannet e oa bet dec’h gant ar gouarnamant e c’hello digeriñ al liseoù en-dro a-benn ar sizhun a zeu. Muioc’h a amzer a vo ezhomm da brientiñ an degemer el lise Diwan. Dont a ra al liseidi deus pemp departamant Breizh, setu ma rank digeriñ ar c'houskva ivez.
"Amañ n’ez eus ket ouzhpenn 110 kambr, setu ne vo ket tu degemer ouzhpenn 110 lisead, n’ez eus ket plas evit tout an dud", eme Jil Quillevere, penn-kasour lise Diwan Karaez. Da lavaret eo ne c’hello dont nemet un drederenn deus an 330 krennard skoliatet el lise.Hep kouskva, lise ebet
Ur protokol yec'hed a zo bet embannet gant ar gouarnamant evit digoradur ar skolajoù hag al liseoù. Evit ar pezh a sell ouzh ar c'houskvaoù e c'heller lenn "n’ez eus nemet ar re dibosupl dezho distreiñ d’ar gêr bemnoz a c’hell bezañ degemeret enno". Pezh 'zo, el lise Diwan, e talv an dra-se evit holl liseidi.
Amañ emaint o tont deus kement korn a zo e Breizh : Naoned, Roazhon, Sant-Brieg, an Oriant, Kemper, Brest… Setu n’ez eus ket moaien dezho dont diouzh ar mintin ha mont kuit en-dro diouzh an noz, a zispleg deomp penn-kasour Lise Diwan Karaez.
Ar skolajoù Diwan o deus kalz a ziabarzhidi ivez. Digoret o deus en-dro - Skolaj Diwan Penn-Ar-Bed, er Releg, en deus embannet un neubeud fotioù war e bajenn Facebook. Met sarr e chom ar c’houskvaoù. Tostoc’h emañ ar skolajidi o chom. Al Lise Diwan, an hini nemetañ e Breizh, ne c’hell ket mont en-dro hep ar c’houskva.
Ul lisead dre gambr er c’houskva
Strizh eo ar reolennoù a-fed yec’hed. Un den a gousko e pep kambr e plas tri sañset. Un aozadur a zo da gavout : netaat ar c’hambreier, gourc’hemenn ar boued evit ar c’hantin da greizteiz ha diouzh noz, adaozañ ar salioù klas da zegemer 15 lisead e plas 30. Un tamm amzer a vo ezhomm d’al lise a-benn digeriñ en-dro.
"Kroget eo al liseidi da zont, dre strolladoù dek hepken, da dapout o zraoù chomet er c’hambreier a-raok ar prantad kenfinañ", a zispleg deomp ur c’hasour. "Da c’houde e vo netaet ha dilouezet ar c’hambreier evit an distro."
Kuzulioù-klas ar sizhun a zeu
Goulenn a ra ar gouarnamant e vefe degemeret da gentañ al lisedi o deus muioc’h a ziaesamantoù. Evit ar re all, e kendalc’ho ar c’hentelioù a-bell. Adalek ar sizhun a zeu neuze, e vo dalc’het ar c’huzulioù-klas hag emgavioù hiniennel da-geñver an heñchañ el lise Diwan. Gouest e vo ar gelennerien da lâret e fin ar sizhun da biv e vo kinniget dont en-dro adalek kreiz miz Even.
Meur a dra a zo da gemer e kont : disoc’hoù ar vachelouriezh dre amprouiñ dibaouez, hentañ pep hini, an transportoù rak leun eo ar c’hirri-boutin d’al lun ha d’ar gwener dija… Labour a zo war ar stern.
