A-bep seurt traoù a vez lakaet e plas gant an Deskadurezh-Stad evit ma kendalc'ho ar skolidi, ar skolajidi hag al liseidi da zeskiñ. An dra ziwezhañ o vezañ sevel goulennoù ouzh an Aotrou ministr bep gwener da 5eur d'abardaez.
"Kenderc’hel da zeskiñ", sed amañ ar pezh a vez goulennet digant ar vugale dibaoe m’eo bet serret ar skolioù, ar skolajoù hag al liseoù. Dre ma 'z int rediet da chom er gêr e vez lakaet a bep seurt traoù e plas gant an Deskadurezh-Stad. An dra ziwezhañ o vezañ sevel goulennoù ouzh an Aotroù ministr bep gwener da 5 eur d'abardaez."Teuer ket da vezañ mestr-skol e-giz-se !"
Ret e vo d’ar gerent ober skol d’o bugale betek ar 15 a viz Ebrel d’an nebeutañ, sikouret a-dra-sur gant ar gelennerien. Dibaoe pemzektez ha deroù ar c'henfinañ e chom bout ar gerent dirak un toullad traoù : mankout a ra dafar a bep seurt da lod eus ar familhoù evel urzhiataerezhioù, lod all ne c’hellont ket ober gant internet er gêr, lod all c’hoazh n'ouzont ket penaos lakaat o bugale da gregiñ e-barzh.Ouzhpenn ar pezh zo bet lakaet e plas gant an Deskadurezh-Stad dija, evel gellet pellgomz d’ar gelennerien pe d’ar guzulierien bedagogel, en deus divizet Jean-Michel Blanquer kemer e lod. Adalek ar sizhun-mañ e c’hell ar gerent sevel goulennoù ouzh ar ministr o skrivañ d’ar chomlec’h-mañ : rendez-vous-parents@education.gouv.fr. Bep gwener da 5 eur abardaez e vo tu lenn e respontoù war savennoù ministrerezh an deskadurezh stad : YouTube, Instagram, Facebook, Twitter.
Remi Toulhoat, prezidant ar gevredigezh kerent Div Yezh, a soñj dezhañ eo "anat ez eo ret d’ar ministr respont d’ar familhoù". "Evit mirout al liamm gant ar gerent eo ret kaout a bep seurt kinnigoù, pe gant oustihloù modern, pe gant an telefon, pe dre lizher."
Ma vez klasket gant an Deskadurezh-Stad mont mod pe vod e darempred gant ar gerent eo abalamour ma chom etre 5 hag 8% eus ar skolidi ha n’o deus roet keloù ebet c’hoazh d’o c’helennerien.
