Prizioù dazont ar brezhoneg 2021 : an disoc'hoù

Bep bloaz e vez aozet prizioù dazont ar brezhoneg gant France 3 Breizh hag Ofis Publik ar Brezhoneg. Teurel a reont sklêrijenn ouzh ar gwellañ krouidigezhioù e brezhoneg er bloaz paseet. An disoc'hoù a zo bet roet. Adskignet e vo d'ar sul 28 a viz Meurzh da 10e10.

Kinniget e vo al lid gant Goulwena an Henaff ha Yann-Herle Gourves
Kinniget e vo al lid gant Goulwena an Henaff ha Yann-Herle Gourves © Jacinthe NGUYEN

Ar Prizioù a lak war wel bep bloaz ar pep gwellañ bet krouet e brezhoneg er bloavezh tremenet. Roet e vez ar garedonoù-se da dud prevez, da gevredigezhioù, da embregerezhioù pe da ensavadurioù o deus lezet ur merk en neveziñ e brezhoneg. Kenaozet eo gant Frañs 3 Breizh hag Ofis Publik ar Brezhoneg.

Seizh rummad a zo bet priziet gant ar bodad-barn : kevredigezh, strollegezh, embregerezh, levr faltazi, oberenn kanet e brezhoneg, kleweled ha brezhoneger.ez ar bloaz.

Ar bodad-barn

Jef Philippe eus Sant-Eganton e-kichen Gwengamp, kaner, konter, animatour radio e RCF.

Mari-Lin Kaodal, renerez skol Diwan an Alre.

Virginie Pronost, bet o labourat e Divskouarn, o tiorren he stal evel kuzulierez ha stummerez evit an oadourien.

Paskal Henry, ezel eus FCPE 44, skoazellañ a ra raktresoù skol ha klasoù e brezhoneg.

Goulven Morvan, kevredigezh Kelennomp, kelenner war ar brezhoneg e Lannuon hag e Pempoull.

Stefan Ac'h, sevener, skrivagner, troer o chom koste Brest, e Plouzane.

Amélie Brard, Ofis publik ar brezhoneg e Gwengamp, kargadez diorren bugaligoù.
 
 

Rummad kevredigezh

1añ priz : Kentelioù an noz. Kelenn a ra brezhoneg d’an oadourien, kinnig stajoù yezhel ha dudi e brezhoneg. Ar gevredigezh he deus ivez lakaet al lec’hienn Mogidell war-sav evit sikour ar skolidi da vont war-raok gant an deskiñ enlinenn.

2l priz : Raok. Bodañ a ra an holl re a fell dezho lakaat ar brezhoneg da vont war-raok e Kreiz-Breizh.

3de priz : Ti ar vro Gwened. Bodañ a ra kevredigezioù Bro Gwened en-dro da yezh ha sevenadur Breizh. Da skouer ez eus bet lakaet kentelioù kanañ enlinenn war-sav gant ar framm, evit ar vugale e-pad ar mareadoù kenfinañ abalamour da zerc’hel d’an deskadurezh-se.
 

Rummad levr faltazi

1añ priz : « Anna Skolan », romant gant Mich Beyer. Winnog Marzhin a zizolo seizh kaier-skol douaret en e liorzh, skrivet gant he ferc’hennez kozh : "Ma anv zo Anna Skolan. Drouklazhet on bet d’an 21 a viz Even 1961. Dek vloaz e oan...". Winnog, kurius ha mennet-start, a glask dirouestlañ al luziadell hag a zizolo ur sekred skrijus (An Alarc’h Embannadurioù ).

2l priz : « Gisti, Tout ! », romant gant Erwan Hupel. "Ret eo diwall diouzh ar baotred. Sachañ a reont  war blev ar merc’hed ! Ret eo din lavaret deoc’h : sujet o deus ar merc’hed, touzet ma mamm, aotennet blev ma mamm-guñv ha lakaet ur c’hoef war blev ma mamm-iou". Marc’harid n’eo nemet unnek vloaz, met klask a ra deskiñ ur bern traoù (Al Liamm).

3de priz : « Kroashent-tro », romant gant Kristian Braz. Ar skrivagner hag ar sevener filmoù a blij dezhañ reiñ buhez da dudennoù gwriziennet mat en o bro. Bretoned ordinal pe dreistordinal, deskrivet gant fent, mousfent pe tenerded. En dastumad danevelloù-mañ e klask an aozer chom tost d’an traoù a vremañ pa heuilh hent ha stourm ar jiletennoù melen (Al Liamm).
 

Rummad strollegezh

1añ priz : Ti-Yec'hed Menez Are. Ti-yec’hed Menez Are, staliet e Sizun, a vod meur a vicher eus ar yec’hed : daou vezeg-familh, seizh klañvdiour, un amiegezh, un osteopat hag un ergoterapeutour. Ordrenañsoù, kartennoù-bizit, panelloù er c’habined : divyezhek eo pep tra, hag unan eus ar vezeien a zegemer ar glañvourien e brezhoneg.

2l priz : Gwern-ar-Sec'h. Ar gêr-mañ a ren dalc’hmat ur politikerezh evit ar brezhoneg. Votiñ ar garta Ya d’ar brezhoneg, krouiñ un hentad divyezhek, c’hoant da staliañ plakennoù-straed divyezhek... E-leizh a luskoù a sevener ivez evit reiñ startijenn da implij ar brezhoneg, en takadoù foran peurgetket.  

3de priz : Lokeored. Ar gumun a ro bod d’un hentad divyezhek e-barzh ar BPE (Bodad pedagogel etrekumunel) asambles gant ar Fouilhez ha Brenniliz. Bez’ ez eo ar c’hentañ skol seurt-se e Kreiz-Breizh o kinnig un hentad evel-se. Kement-se a ziskouez e c’hall kumunioù bihan kengret war ar maez kinnig un deskadurezh divyezhek.   
 

Rummad kleweled

1añ priz : Zero Lastez. Un heuliad seizh pennad eizh munut, sevenet gant Perynn Bleunven ha Justine Morvan, kenbroduet gant Frañs 3 Breizh ha Kalanna. An div blac’h yaouank a ginnig deomp heuliañ o avanturioù evit talañ dre gaer ouzh dae ar zero lastez. E-pad ur miz e klaskont chom hep produiñ tamm lastez ebet. N’eo ket ken aes-se… 

2l priz : Krogit. Bez’ ez eo istor un den kollet war ul leurenn filmañ... Ur film faltazi berr sevenet gant Morzhol Prod, ur strollad tud eus Penn-ar-Bed deuet eus lies micher an arvest hag ar sinema, lusket gant ar c’hoant da seveniñ filmoù faltazi e pep frankiz gras d’an embroduiñ.

3de priz : 13 munud e Breizh. Ar programm-mañ, produet gant Brezhoweb, zo un heuliad teulfilmoù hag a ginnig ober anv e brezhoneg eus an darvoudoù pouezusañ en traoù a vremañ Breizh. An teulfilm kinniget a zistro war reuz ar c’horonavirus diouzh savboent ar re a sogn an dud, er renk kentañ en un enkadenn yec’hedel evel ma ne oa ket bet biskoazh.

 

Rummad embregerezh

1añ priz : Edern Perennou. Ar c’hlañvdiour-mañ, ouzhpenn ar prederioù klasel, zo stummet evit istimañ ha tretañ ar boan, en e gabined pe e tiez an dud. Kinnig a ra ar pourchasoù mezegel-se e brezhoneg ivez. Divyezhek eo e blakennoù-micher, e sielloù, e gartennoù-bizit ha talbenn e lizheroù. 

2l priz : Carabreizh. An embregerezh a fard hag a werzh lipouzerezh breizhat a bep seurt, diwar garamel peurgetket, a fell dezhañ ivez lakaat ar brezhoneg war wel en ur mod brav. Divyezhek eo ar panelloù-hent evit mont e-barzh pe e-maez e ziazezadurioù.

3de priz : Le Finistère Assurance. Ar c’hevredad-mañ a ginnig kevratoù diyvezhek evit asuriñ ar bagoù-bale. Evit-se ez eus bet ezhomm eus ul labour bras evit treiñ ar c’heriaoueg difer ha lezennel.
 

 

Rummad oberenn kanet e brezhoneg

1añ priz : Brieg Guerveno - 'Vel ma vin. Ar c’haner hag ar soner a aoz ur strobad kanaouennoù e brezhoneg gant ur vouezh nesaouegour. Lakaat a ra e ved metal da vont war-zu ar sonerezh folk a selaouer evel ur galv evit ur momed habaskted, en ur sellet ouzh an hent a zo bet graet hag en ur dreiñ war-zu an amzer da zont.

2l priz : Madelyn Ann. An arzourez-mañ a stumm un triad gant daou c’hitarour Olivier an Hir ha Gaëtan Fagot. Kemeret he deus tro eus ar reuz yec’hedel evit tennañ traoù mat anezhañ ha sevel kanaouennoù nevez, kanet e brezhoneg ha skignet enlinenn. Enno e ra anv, da skouer, eus temoù liammet ouzh an traoù a vremañ evel parezon an embroidi pe frankiz ar merc’hed.

3de priz : Nava - Peroked. Setu amañ kentañ albom embroduet ar strollad-mañ a zo war un dro gwriziennet mat en hengoun kanet Breizh ha digor war sonioù ar bed hag ar muzikoù a vremañ. Un albom livus-kaer ha leun a nerzh, etre ar rock ha sonerezh ar Reter.

 

Rummad brezhoneger.ez ar bloaz

1añ priz : Per Morvan. Lakaet en deus en e reizh un difazier testennoù brezhonek, hag emañ o labourat da sevel ur meziant er yezh-se. Binvioù hag a gemer perzh e diorroadur implij ar brezhoneg en TNKK (Teknologiezhioù nevez ar c’helaouiñ hag ar c’hehentiñ).

2l priz : Sandrine Lefebvre-Hubert. Ijinañ a ra albomoù e brezhoneg evit ar vugaligoù, ha skrivañ ha skeudennaouiñ a ra anezho. Divizet he doa an aozerez deskiñ ar yezh-se un dek vloaz bennak zo pa oa erruet e Roazhon. Dont a ra he levrioù da binvidikaat ar c’hinnig levrioù brezhonek evit ar re yaouank. Lili eo harozez an albomoù pedagogel ha dudius-se, deuet er-maez e-kreiz ar reuz yec’hedel.

3de priz : Stefan Carpentier. Atravet eo gant ar sport ha gourdoner sport a vicher eo. Krouet en deus e chadenn YouTube evit kinnig kentelioù jiminas ha da greñvaat ar c’higennoù e brezhoneg e-pad ar maread kenfinañ. Peadra da lakaat ar vrezhonegerien d’ober un dra bennak gant o c’horf ha da bleustriñ ar brezhoneg, ha pa vefent kenfinet en o ziez. 

Poursuivre votre lecture sur ces sujets
culture bretonne culture culture régionale musique littérature livres économie vie associative société cinéma politique