Abaoe dilun eo posupl distreiñ da di ar varc’hadourien levrioù. Start eo bet ar mare kenfinañ. Laouen int o tegemer ar pratikoù en o stal pe dre internet. Pep tra zo bet prientet evit ma vefe dizañjer.
Tamm-ha-tamm e wel Marijo Mellouet he fratikoù o tont en-dro. Dimeurzh he deus addigoret he stal-levrioù, anvet "Penn da benn", e kreizh kêr-uhel Kemperle. "Kontant e oa an dud goude un troc’h bras. Ul liamm a zo chomet etrezomp. Ul lec’h ma c’heller prenañ levrioù a dalv ouzphenn ur stal. Ul lec’h sokial e teu da vezañ" hervezi.
Arabat touch al levrioù !
Memestra e rank ar pratikoù cheñch o boazioù abalamour d’ar c’h/Covid-19. Echu an amzer benniget pa veze posupl straniñ etre an astelladoù ! Ar reolenn nevez a zo chom hep touch. "N’eus nemedon a gemer al levrioù. Fiziañs o deus ar glianted en alioù roet ganin, eüruzamant !" Ne blij ket re d’al levrdiourez labourat e mod-se met "un doare eo ivez da zinec’hañ ar re ne gredont ket distreiñ d’ar stal."
Evel ar goñversanted all e kinnig un dileizhenn hidroalkoolek e toull an nor. Digontammet e vez ivez an termenell elektronek evit paeañ gant ar gartenn-vank.
Diarbennoù damheñvel a zo bet lakaet e pleustr gant Kaou Gwen abaoe dimeurzh. Derc’hel a ra ar stal Coop Breizh e Kemper. Laouen eo oc’h adkavout e voutikl. "Oc’h adaozañ ar stal emaon. Evel stal Coop Breizh An Oriant ne zigorin nemet tri dervezh da gentañ (meurzh, yaou ha sadorn). Dont a ra an dud en-dro, trankilik, n’eo ket leun-chouk ar stal."
Urzhiañ enlinenn
Ha gwell a se : Amañ ivez ez eo bet cheñchet an doare da zegemer an dud. "Arabat dezho mont da furchal e pep korn ar stal. Un daol a zo bet staliet en antre evit mirout anezho da vont pelloc’h hep bezañ harpet ganin. Al levrioù a zo bet touchet a vo kenfinet un dervezh ! Ma z’eo ur bladenn dindan ur golo plastik e vo netaet gant ur produ ispisial. Ret eo deomp taoler evezh. Gwelloc’h eo ma c’hell an dud telefoniñ a-raok dont pe urzhiañ enlinenn."
Gwerzhañ dre internet zo bet kinniget gant Marijo Mellouet ivez. An distro zo bet prientet e fin miz Ebrel, da vare ar c’henfinañ. Staget he doa da ginnig d’he fratikoù rakprenañ levrioù enlinenn. "An dud a glaske war bajenn Facebook ar stal. Ur wech kavet e c’hellent dont da gerc’hat o levrioù dirak ar stal, da eurioù resis."
Berr an arc'hant gant ar stalioù
"Lod eus ar glianted o doa aon e chomfen serr da vat !" Tamm ebet. Bev eo atav "Penn da Benn." Met n’eo ket bet aes derc’hel mat e-pad ar mare kenfinañ o chom da labourat er gêr war teuliadoù arc’hantaouiñ dreist-holl. "Eüruzamant n’eo ket bet drouk an ti-bank" eme Marijo en ur c'hoarzhin. "Aes a-walc’h en deus prestet arc’hant. Evel just, e vo ret din bezañ gouest da zaskoriñ ..."
N’eo ket bet heñvel evit Kaou Gwen a zo gopred gant Coop Breizh. Chomet eo ehanet e-pad daou viz. "Ur prantad dilabour. Ne c’hellen ket pellabourat."
Marijo, hi, a zo ankeniet un tamm o soñjal er mizioù o tont. "Sur a-walc’h e vo gwashoc’h an traoù a-hed ar bloaz. Evit poent n’em eus ket paeet an Urssaf, ar bourvezerien... ret e vo din en ober a-benn nebeut."
Kenderc'hel a raio da werzhañ enlinenn. Un doare "drive" pe kentoc’h "klik ha kas" evel ma lâr Marijo. Laouen e vefe ar varc’hadourez da labourat gant ar Vretoned divroet. "Kontañ a ran war an diaspora un tammig. En hañv-mañ ne vo ket leun a douristed er vro..."