In Bastia l’associu d’amparera di u Corsu in immersione Praticalingua hà ripigliatu u so travagliu. Quist’annu seranu quasgi 300 scritti per pièu di 30 attelli.
E vacanze sò compie per l’insignanti è i « stazianti » di l’associu Praticalingua. Ghitarra, storia, teatru, creazione literraria, quist’annu l’offerta cresce. L’associu prupone più d’una trentina di furmazione in immersione linguistica.
Si pò seguità corsi di lingua ma l’idea hè di ghjuvà si di a lingua corsa per amparà astr’affari. Tandu a lingua ritrova u so scopu principale, quellu di a cumunicazione. Sò pruposti dinù corsi per i prufezziunali di l’inzignamentu : « Avemu circatu soprattuttu d’arrecà soluzione à a prufessiunalisazione di u corsu. Ci sò attelli per l’insignenti : unu di creazione di risorze pedagogiche è unu per priparà i nostri culleghi à l’abilitazione à l’insignamentu bislingue » ci dice Alexandre De Zerbi, capimachja di l’associu.
Più di 300 scritti
Si scioglienu l’attelli ogni sera da u luni à u venneri à u teatru Sant’Anghjulu. Pichjate quì per scopre l’offerta è l’attelli novi. S’è cresce l’offerta, a dumanda dinù. Quist’annu seranu più di 300 persone à vulè seguità omancu una furmazione.
A testimugnanza chì a vuluntà d’amparà u corsu ci hè. Un successu tremendu chì pò dà parechje idee à i puntelli di l’associu messu in ballu in Bastia trè anni fà. Cum’è quellu di stallà si ind’a Corsica sana.
Affare novu, quist’annu Praticalingua hà firmatu un partenariatu cù u Greta Cismonte, a merria di Bastia è l’associu Pinziglione. Pruponenu 3 formule d’amparera di u corsu in immersione. 90 ore per i maiò è di rigalu !
