Cume a manca sana à l’assemblea di Corsica, cunnosce u PRG Cismonte scuzzulate maiò è cerca a so strada per l’avvene. A palesa a prossima dipartimentale di Bastia 3.
Una sola elezzione è duie candidature PRG, eccu a testimugnanza di e divisione chì toccanu u Parti Radical de Gauche. A l’urigine di l’annulazione di l’elezzione di Bastia 3, u coppiu PRG Joseph Martelli Anne-Marie Piacentini sperava di fà fiascà José Gandolfi è Emmanuelle de Gentile di a maghjurità municipale Bastiaccia, u 2 è 9 d’ottobre chì vene.
Ma a simana scorsa annunzia u PRG un antra candidatura, fatta d’una unione cù u MCD, u partitu di François Tatti.
Per avà sta candidatura ùn hè ancu ufficiale ma Marie Claire Poggi (MCD), chì era stata eletta cùn José Gandolfi per a maghjurità Bastiaccia duveria esse accumpagnata d’un candidatu PRG sta volta.
Un anunziu chì indibulisce u binomu Martelli-Piacentini. I dui candidati dicenu chì ùn eranu micca à capu di st’unione.
Duie tindenze sfarente, duie visione opposte
Ma daret’à u terzu cantone Bastiacciu, si trovanu parechje tensione maiò trà duie tindenze sfarente.D’un latu Anthony Alessandrini, presidente di u PRG dapoi u mese di ghjunghju. Di l’astru Jean Zuccarelli, chì rimette in causa a so elezzione. L’anzianu candidatu à a merria di Bastia hà d’altronde fattu un ricorsu dop’à l’elezzione à a presidenza di u PRG Cismonte.
Ma u scagnu naziunale di u partitu ùn hà ancu studiatu l’affare.
Aldilà di u bisbigliu trà dui omi o duie famiglie, sò veraimente duie visione pulitiche chì s’opponenu.
Jean Zuccarelli, chì ferma nant’à parechje scunfitte eletturale, ferma fidu à l’idee tradiziunale ripublicane di u partitu.
Anthony Alessandrini, ellu puru magiuritariu, hè decisu à piglià un antru versu. Quellu di l’autunumia, eppuru opposta à i puntelli storichi di u PRG. Un cambiamentu radicale. Chì hà per scopu di fà cuncurrenza à i naziunalisti. Pare chì certi ùn truvessinu a so piazza indè stu schema…
A pulitica hè fatta à scala, à chì colla à chì fala
St’andatura nova piuttostu stunente saria, sicondu quelli chì l’annu messa in piazza, una manera d’andà versu l’unione di a manca, propiu schiattata oghje à l’assemblea di Corsica.Allora chì u PRG era u partitu u più impurtente di Corsica sin’à pocu, purtatu da François è Paul Giacobbi, o da Emile Zuccarelli, oghje e vittorie sò sparite quant’è i capimachja dop’à e scunfitte à a merria di bastia (2014), è a l’assemblea di Corsica (2015).
Si cerca allora à truvà d’astre personne, è François tatti duveria avè a so piazza per purtà st’andatura nova in Bastia.
Ellu stessu chì era statu lampatu fora da u PRG dop’à a so unione, chì ùn esiste più, cùn Gilles Simeoni à a merria di Bastia. Ellu stessu dinù chì era falatu à cutrate nant’à u partitu nanzu à l’elezzione di Bastia.
