Montesoru, Lupinu, Paese Novu... tanti "quartieri" d'oghje chì sò in fatti paisoli d'eri.
Una di e nostre squadre hè partuta à scopre issi lochi antichi è a so storia.
Sò unipochi d'amichi ingiru à un caffè, inde u quartieru di Lupinu.
Tutti sò passiunati di storia è di tupunimia, è s'adduniscenu guasi ogni ghjornu.
L'occasione di discore di u passatu campagnolu di i quartieri di Lupinu, Montesoru è Paese Novu, è di ramintà lu.
"A nostra Bastia hè bella è fiera di face parte di a nostra cursichella" lampa cusì un omu à a nostra camerà.
Perchè ci vole à sapè chì sin'à u 19 simu seculu, issi lochi eranu l'orti di Bastia.
Prova si ne, fermanu sempre i chjassi cummunali ch'elli pigliavanu tandu l'agricultori.
Una carta per amparà
Aghje, forni, muri : sò parechje in Lupinu e tracce di l'attività agricula.
"D'appressu à me si vede ch'ellu hè una pozza chì ghje cuparta, dunque qui ci eranu l'orti. Ci hè a data 18 centu è qualcosa. Raprisenta una pruprietà, s'induvina ch'ellu ci eranu l'orti." spiega Cesariu Raffini accant'à un muru anzianu.
Cun ellu issu ghjornu quì, Petru-Pà de Casabianca, fundatore di u situ internet A piazzetta, ch'hè andatu anch'ellu à pruminà nant'à i chjassi di Bastia.
U scopu : fà u ricensu di i camini cumunali nant'à una carta numerica è, parchè micca, dà a voglia à a ghjente d'andà à scopre u patrimoniu di a so cità.
Scambià u sguardu di a ghjente nant'à a cità, rendè lu piu pusitivu, valurizante : eccu ciò ch'elli cercanu à fà Petru-Pà de Casabianca, Cesariu Raffini è u so gruppu d'inchiestatori.
E per cunnosce i so lochi, megliu à dumandà à quelli chi sanu : l'anziani.
"U chjassu si marchjava tuttu u longu, si n'andava di l'astra parte in Agliani è ricullava verdi e coste rosse è si rifallava di l'altra parte. Ci era tuttu i rappelli per riculà versu u supranu.
Eranu per tuttu u mondu, tutti quelli ch'avianu i terreni chì facianu e vigne. Iè, eranu piuttostu terre à vigne." ci dice un abitante di issi lochi.
Pochi studii sò stati fatti nant'à u passatu campagnolu è vignarolu di Bastia.
D'appressu à l'abitanti di i quartieri cuncernati, hè pocu tempu dop'à a guerra chì e vigne sò state abandunate.
Di sti tempi, fermanu sempre qualchì vistiche.
L'esempiu di u Machjone
Chi fà d'issu patrimoniu è d'issi chjassi, per a maiò parte abandunati ?
Speranu i nostri inchiestatori ch'elli sianu messi in valore da a municipalità o a culletività.
Sta sperenza, hè dinù quella di Louis-Thomas.
Natu in lu quartieru di u Machjone, hà oghje 86 ani è vularia vede rimesse l'anziani mulini di Lupinu, cum'è quellu ch'ellu ci era vicin'à a so casa.
Cù u tempu, Louis Thomas hà vistu scambià u so quartieru. Quand'ellu s'hè stallatu quì, 50 anni fà, i casali eranu campi d'alivi.
"Quì, era un campu d'alivi, chjuchi, ma ci era sempre un pecuraghju chì vinia à fà pasce e so pecure, dopu u terrenu è statu vendutu. A mo moglia m'hà dettu "vindimu è ci n'andemu in villa" ma ùn possu micca, sò cinquant'anni chì sò quì. Un ci era nunda è avemu fattu una casa, un giardinu. Quì, ghjè a mo vita".
Oghje, di u quartieru di u Machjone, ferma solu u nome.
