Droga in Corsica suttana : ritornu nant'à l'uperazione di u 2022

Ottu parsone sò state intarpillate a settimana scorsu in u circondu aiaccinu in u quadru di un trafficu di droga. Tutte sò state messe in esamine è incarcerate. Custannu, hè a sesta uperazione antidroga à Pumonte. Dapoi u mese di farraghju, più di 120 chilò di droga sò stati chjappi da e forze di l’ordine.

Ottu parsone messe in esamine, è 20 chilò di canapu chjappi.

Hè a sesta uperazione d’intarpellazione ind’u quadru di un trafficu di droga à Pumonte custannu. In data di u 9 di nuvembre.

A prima di l’annu, hè stata di farraghju. In Lançon-Provence, a pulizza ghjudiziaria è l’OFAST (l’uffiziu antidroga), chjappanu un camiò d’una impresa aiaccina. À u so bordu : 84 chilò di canapu. 4 omi sò piazzati in guardia à vista à u cummissariatu d’Aiacciu, 4 altri in Marseglia è Bastia. 6 parsone sò finalamente messe in esamine.

Quattru mesi più tardi, di ghjugnu, a precura d’Aiacciu lancia un’uperazione maiò. 17 parsone sò chjappe. Sò suspittate di piglià parte à un trafficu di droga assai largu trà Aiacciu è Prupià.
Durante e parchisizione, 12 chilò di cocaina è di rasgina di canapu sò trovi. L’inchiestadori chjapparanu dinò 65 000 euri in liquidu, arme è vitture.

Tutte e parsone intarpillate sò messe in esamine.

In Aiacciu, u procurore di a Republica d'Aiacciu tene allora una cunfarenza di stampa. A lotta contru à a droga hè una priurità.

"Le message que je tenais à faire passer, c'est qu'on travaille beaucoup sur les trafics de stupéfiants, spiegava allora Nicolas Septe.  L'action de la gendarmerie, de la police et des services en général de l'autorité judiciaire sont importants sur l'île, parce qu'on a toujours à travailler dans ce domaine qui génère de l'argent sale. Il faut savoir que ce dossier illustre aussi l'aspect blanchiment de cet argent."

Trè ghjorni dopu, un’uperazione hè torna in anda. In carrughju di l’Empereur, in Aiacciu, trè parsone sò arristate da a pulizza ghjudiziaria è a brigade di ricerca è d’intarvinzione. 3 chilò d’eroina è di rasgina di canapu sò pigliati. Dui di I trè omi chjappi, sò messi in esamine.

120 chilò di droga chjappi da e forze di l'ordine

D’istate cuntinuveghjanu e parchisizione. U prima di lugliu, sempre in Aiacciu, si tene torna un’intarvinzione in carrughju di Pietralba. L’autorità cascanu annantu à 90 000 euros in liquidu, 3 chilò di cocaine è di rasgina di canapu, ecstasy è eroina. Annantu à e cinque parsone piazzate in guardia à vista, trè saranu messe in esamine.

Allora chì u calmu pare rivene annantu à a cità imperiale, fine d’ottobre, 4 parsone sò arristate in carrughju di e Cannes. Sò suspittate d’avè vindutu più di 450 000 euri di droga in trè mesi. Saranu tutte, edde dinò, messe in esamine.

Dapoi u principiu di l’annu, più di 120 chilò di droga sò stati chjappi da e forze di l’ordine. Par avà, 40 parsone sò state messe in esamine.