Difi Zero lastez : ur miz hep lastez, krogomp ganti

Kemeret eo an diviz ganeomp : stagañ a reomp gant an difi Zero lastez ! Touiñ a reomp chom hep kuzumiñ plastik e-pad 1 miz. Met petra talvez bezañ “Zero lastez” ? E-pad ur miz e vo tu deoc'h heuliañ ac'hanomp war rouedadoù sokial F3 Breizh bep yaou ha bep lun e miz Mae.

Perynn ha Justine : "Emaomp o vont da chom hep kuzumiñ plastik e-pad ur miz" !
Perynn ha Justine : "Emaomp o vont da chom hep kuzumiñ plastik e-pad ur miz" ! © Kalanna
Difi Zero lastez rann 1 : poent eo kregiñ 'barzh


Ni, ar blanedenn hag an ekologiezh

‘Maez ar vignoniezh, ar sonerezh hag ar video ez eus un dra a vod ac’hanomp an div : an ekologiezh. Penaos chom diseblant dirak gwalldanioù Aostralia pe
Brazil ? Levezonet omp gant tudennoù kreñv, evel Greta Thunberg hag he c’hoant lakaat ar pennoù bras da blegañ dirak an enkadenn ekologel treuzet ganeomp.
 
Prezegenn Greta Thunberg dirak ar Broadoù unanet e 2018

Klask a reomp ober hor seizh gwellañ evit tostaat eus un doare bevañ doujus eus an endro. Met ret eo deomp ansav : n’eo ket trawalc’h evit lakaat an traoù da cheñch. Diaes e seblant deomp kavout diskoulmoù fetis hag hiniennel evit mont war-raok war an dachenn-se, ken ledan ha bedel eo kudenn an ekologiezh.

Plastik, plastik, plastik…

Ha c’hoarvezet eo deoc’h leñvañ dirak ho poubellenn leun a blastik, krignet gant ar gablusted ? Deomp-ni ya !
Ar plastik, gwerzhet deomp e-giz un danvez burzudus er bloavezhioù 60, a zo deuet hiriv-an-deiz da vezañ ur gudenn ramzel evit ar blanedenn hag ar morioù dreist-holl.
 
Neuñviet en deus Benoit Lecomte 500km er "c'hevandir plastik"

Petra ober? chom da leñvañ ? Morse! Biken!
Goude eurvezhioù straniñ war youtube eo deuet war wel deomp ur c’hinnig dibar evit en em zizober eus ar plastik : an difi Zero lastez !
Ur skouer difi Zero lastez war ur sizhun

N’hon eus ket bet ezhomm muioc’h amzer evit dibab stagañ gant an difi : ‘benn 30 devezh, gant youl ha spi, e teuimp da vezañ mestrezed ar Zero lastez ! 
Penaos en em brientiñ d’an difi ?

C’hoant ho peus c’hwi ivez kregiñ gant an avañtur ? Setu un nebeud kuzulioù fur : 

- Kaout ur c’hompost evit fardañ rotel. Unan a oa ganeomp dija a-raok kregiñ gant an difi, ar pezh a rann dre zaou (d’an nebeutañ) ar poubellennoù. Bevañ a rit en ur ranndi? N’eo ket ur gudenn, Claire eus ar gevredigezh Côte Waste a zispleg deoc’h penaos en em dennañ : 
Alioù fur evit roteliñ er gêr

- En em zitouriñ war ar Zero lastez. Sellet hon eus kaaaaaaaalz videoioù ha lennet pennadoù war internet evit kaout ur soñj eus petra a c’hellfe c’hoarvezout deomp ha reiñ un dalvoudegezh gwirion d’an difi. Kit da furchal war internet, ur bern traoù a zo da lenn ha da sellet!

- Cheñch ar boazioù a gemer amzer. Arabat deoc’h bezañ re strizh ganeoc’h ho-unan, n’hallit ket bezañ direbech diouzhtu!

- Have fun ! Gant ijin ha fent e vo an difi ur mare plijus a cheñcho (ul lodenn) eus ho puhez.
Poursuivre votre lecture sur ces sujets
écologie environnement culture bretonne culture culture régionale