L'Ubapar, créée en 1984 pour animer culturellement la Bretagne rurale, fête ses 40 ans à Rostrenen le 20 avril. Aujourd'hui, l'organisme continue son travail d'éducation populaire et propose de la formation, tout en coordonnant les camps de vacances en breton et en gallo. Voyez notre reportage sous-titré et notre article en breton.
Lidañ a ra an Ubapar 40 vloaz a labour da vuheziñ ar maezioù
Disadorn e vo lidet e Rostrenenn deiz-ha-bloaz Unvaniezh Breizh evit buheziñ ar broioù war ar maez. Krouet e oa bet e 1983 evit klask degas buhez sevenadurel en diavaez eus ar c'hêrioù bras. Brudet eo bremañ evit kenurzhiañ ar c'hampoù vakañsoù e brezhoneg hag e gallaoueg.
Ganet e oa an Ubapar daou-ugent vloaz 'zo da heul luskad an oaledoù war ar maez. "Pal an aozadurioù-se, krouet goude an eil Brezel Bed, a oa e vefe buhez sevenadurel ha dudi war ar maez, hag e c'hellfe an dud chom er vro hep mont da Bariz, o kaout kalite buhez", a zispleg Riwanon an Habask, kenurzhierez rannvroel an Ubapar. "Tamm-ha-tamm e oa bet krouet kevredigezhioù brasoc'h, war meur a gumun, lec'h ma oa posubl goprañ tud. Ha ganet eo an Ubapar evit kenurzhiañ tout al labour-se war ul live rannvroel."
Hiziv an deiz c'hoazh e kendalc'h al labour-se evit ar rouedad. "Klask a reomp gwelet peseurt ezhommoù a zo war an dachenn ha peseurt strivoù a zo d'ober a-stroll, ha diwar-se e kinnigomp eskemmoù, ostilhoù a c'hello bezañ implijet gant an holl e Breizh", a gendalc'h Riwanon an Habask.
Stummañ buhezourien
Ul labour stummañ a-bouez a vez kaset da benn gant unvaniezh ivez, dreist-holl evit buhezourien ar c'hreizennoù dudi, pa vefent e galleg, e brezhoneg pe e gallaoueg.
Warlene e oamp bet da filmañ unan anezho, lec'h ma veze desket ivez bezañ evezhier kouronkañ.
Met rankout a ra ivez an aozadur talañ ouzh diaesterioù liesseurt. "N'ez a ket war gresk an arc'hant publik, anat eo", eme Riwanon an Habask.
Ha n'eo ket anat atav sachañ trawalc'h a dud yaouank da ziorroiñ ar c'hampoù vakañsoù asambles gant ar c'helenn divyezhek. Warlene e oa bet diaes kavout renerien evit kampoù 'zo.
LENN. Klask zo war renerien kampoù vakañsoù
Eskemmoù a-raok ar fest-noz
Disadorn 20 a viz Ebrel, e Rostrenenn, e vo lidet 40 vloaz an Ubapar. Eskemmoù ha prezegennoù a vo aozet a-hed an devezh, a-raok ur fest-noz gant Llim, Planchée pe c'hoazh Segal. Peadra evit lakaat buhez e Kreiz-Breizh, anat deoc'h.
