Gant Herri Gourmelen eo aet unan eus mouezhioù kreñv Breizh

Aet eo Herri Gourmelen da anaon d’ar 5 a viz Du e Sant-Maloù. Unan eus krouerien Unvaniezh Demokratel Breizh e oa bet a-raok bezañ dilennet er C’huzul Rannvro etre 2010 ha 2015. Mouezhioù niverus a sav hiziv da zougen bri dezhañ.
 
Herri Gourmelen, gant Mona Braz, e hantergelc'h kuzul-rannvro Breizh, e 2013.
Herri Gourmelen, gant Mona Braz, e hantergelc'h kuzul-rannvro Breizh, e 2013. © France Télévisions
"Glac’haret on rak un den meur e oa Herri evit an holl rannvroelourien omp-ni", eme Paul Molac, kannad ar Morbihan, goude ma vefe aet Herri Gourmelen, 77 vloaz, da anaon.
 
Ganet e oa Herri Gourmelen e Argol, e ledenez Kraozon e Penn-ar-Bed, e 1943 ha dalc’het en doa ennañ brezhoneg ar vro. Aet e oa da gelenner war an alamaneg ha bevañ a rae e Sant-Maloù (Il-ha-Gwilen), lec’h ma oa bet kuzulier-kêr.

Adalek 2010 eo bet kuzulier rannvro, er strollad UDB. E gamaladed, bet kuzulierien rannvro asambles gantañ, a zoug bri dezhañ war ar rouedadoù sokial.  
"Ur stourmer dibleg eo bet, eme Lena Louarn, besprezidantez Rannvro Breizh. Un den plijus ha doujus e oa met gouzout a rae difenn e vennozhioù, forzh piv a vefe bet e-tal dezhañ. Morse n’en deus dilezet ar mennozhioù o doa kaset anezhañ da grouiñ an UDB pa oa 16 pe 17 vloaz : emrenerezh evit Breizh. Un den desket, lemm e spered e oa, hag arguzennoù kreñv a veze gantañ."

En abadenn-mañ, enrollet evit Bali Breizh e 2013, e konte Herri Gourmelen penaos e oa bet krouet an UDB gantañ hag ur strolladig tud-all.
Bali Breizh - 31/03/2013

 

"Doujañs en doa Herri ouzh mennozhioù ar re all, zoken e enebourien bolitikel, hervez Paul Molac. Alies e kave an hent evit ober un tamm hent gant strolladoù-all, evit tizhout ur pal resis. E bal pennañ a zo bet atav : gounit muioc’h a zasparzh er galloudoù etre ar c’hreiz hag ar rannvroioù. Mennozhioù justis sokial kreñv a oa gantañ hag hervezañ e oa liammet an traoù : ret e oa digreizennañ ar galloud rak servijout a rafe an dud hag an tiriadoù gwanañ ivez."

Mouezh don ar c'haner


Difenner ar brezhoneg e oa ivez. "Bep tro en deus pouezhet evit donaat ar politikerezh yezh", he deus soñj Lena Louarn. E-pad pell en deus Herri Gourmelen roet kentelioù brezhoneg e bro Sant-Maloù, ar yezh en doa desket a-vihanik.

"Don e oa e vouezh pa gomze, ha pa gane e oa gwiroc’h c’hoazh, eme Paul Molac. Ur c’haner a-feson e oa".
E 2015, pa oa bet dilennet Loïg Chesnais-Girard da brezidant ar Rannvro en doa Herri Gourmelen lañset Bro Gozh ma Zadoù, kan broadel Breizh, e hantergelc’h ar Rannvro. Aet e oa an dilennidi-all d’e heul, evel ma weler war ar filmig da heul, tapet war ar prim.
Bro gozh ma zadoù e kuzul-rannvro Breizh, 2015.


 
Poursuivre votre lecture sur ces sujets
politique culture bretonne culture culture régionale