Ha dalc’het e vo ar c’hampoù hañv evit ar vugale ? An aozerien war varteze

Tamm-ha-tamm e vez digenfinet ar vro met n’eo ket aotreet pep tra c’hoazh, pell alese. Emañ an oaozerien kampoù vakañsoù evit ar vugale o c’hortoz titouroù a-berzh ar Stad. Ezhomm o deus da c’houzout peseurt protokol yec’hedel a vo da zoujañ outañ.
Spi o deus an aozerien kampoù vakañsoù e vo posupl degemer ar vugale en hañv. Met penaos ober ? Resisadurioù a-berzh ar Stad a zo gortozet.
Spi o deus an aozerien kampoù vakañsoù e vo posupl degemer ar vugale en hañv. Met penaos ober ? Resisadurioù a-berzh ar Stad a zo gortozet. © France 3 Bretagne

"N’eo ket splann tamm ebet an traoù evit poent" eme Maëlle Ausias eus an Ubapar. "Evit poent e kendalc’homp da gemer an enskrivadurioù hep gouzout ha dalc’het e vo ar c’hampoù met ne vo ket enkefiet ar chekennoù a-raok devezh kentañ ar c’hamp." Ur rouedad a gevredigezhioù a vez strollet gant an Ubapar. Ganto e vez aozet ar c’hampoù evit ar vugale.

Lod anezho a zo bet nullet dija : re ziaes e vije bet kas anezho da benn, forzh peseurt reolennoù a vefe embannet. Da skouer, ur c’hamp e Bro Euskadi gant krennarded, kampoù er roulotennoù, kampoù seurf e Kloar-Karnoed...

Memes protokol hag er skol ?


Memes mod, ne vo ket eus an div sizhunvezh war varc’h-houarn e bro Montroulez kinniget gant KLT. Ar pal a oa foetañ bro a-hed an hentoù-houarn kozh, 30 kilometrad bemdez, ha kousket dindan an deltenn e-pad an noz. War ar roll e vije bet sport, gweladennoù, beilhadegoù hag all evit ar vugale. Istimet he deus ar gevredigezh e vije bet "diaes-kenañ lakaat e pleustr ar protokol yec'hed goulennet" evel ma skriv war he lec’hienn internet.

"Furoc’h e oa nullañ" a zispleg Christian Le Mener eus KLT. "Evit meur a abeg. Da gentañ, n’eo ket sur e vo aotreet degemer bugale e stajoù. Evit poent n’eus mann ebet sklaer. Da c’houde ? Peseurt protokol a vo ? Memes hini hag er skol ? Ne fell ket deomp ober-se. Ne vije ket vakañsoù evit ar vugale ha diaes kenañ evit an animatourien."

Ouzphenn-se n’eus ket bet a vruderezh evit ar stajoù. Ar bloaz-mañ, n’eo ket bet dasparzhet levrig stajoù an Ubapar er skolioù a-raok vakañsoù Pask abalamour d’ar c’henfinañ. "War ar memes kampoù marc’h-houarn hon doa bet 18 bugel warlene. Ne oa nemet unan ragenskrivet ar bloaz-mañ" eme Christian Le Mener.

Azasaat ar c’hampoù


Klask a ra an Ubapar azasaat ar c’hampoù all en ur zoujañ d’ar jestroù herzel, hep ma vefe stok-ouzh-stok ar vugale. "Sañset e ouezimp hiroc’h a-benn an 2 a viz Even" a lâr Maëlle Ausias. Marteze e vo resisadurioù e prezegenn ar c’hentañ ministr dizioù. Munudoù eil prantad digenfinañ a vo roet gant Edouard Philippe. Ur bern goulennoù a zo gant bed ar buheziñ.

"Peseurt kondisionoù a vo gant ar gouarnamant, peseurt kampoù a vo kadarnaet ? Ha posupl e vo lakaat daou vugel da gousket er memes kambr ? Ha penaos e vo frealzet ur bugel o leñvañ ? Emaomp o c’hortoz da welet peseurt protokol a vo savet."

Spi zo gant Maëlle Ausias e vo lemet an harz da vont pelloc’h evit kant kilometrad eus an ti evit ar vugale a gemero perzh er stajoù e brezhoneg. "Mod all, ne c’hello ar re a zo o chom e Liger-Atlantel mont nemet d’ar c’hampoù aozet en Henbont pe e Roazhon". C’hwitet e vefe ganto ar stajoù dalc’het e Penn-ar-Bed pe en Aodoù-an-Arvor.

Bep bloaz e vez degemeret daou vil bugel en ur c’hant bennak a stajoù gant rouedad an Ubapar. Betek bremañ he deus bet Maëlle darempredoù frouezhus gant ar gerent he deus gwelet. "Inti hag o bugale a zo mennet-tre". Met ar re all ? "Fiziañs o do en animatourien ? Ha ma teufe ar c’horonavirus ? Ha ma vefe kerent o tougen klemm ma vefe paket o bugel gant ar c’h/Covid-19 ?" Ur gevredigezh taget ne vefe ket gouest da zizeriñ an darvoud-se hervezi.

"Ar gwir da vont d’an natur"


Hep lakaat den ebet en dañjer, emañ an aozerien kampoù hag an Ubapar o labourat evit gellout kinnig dudi d’ar vugale. Stourm a reont gant aozadurioù all evit "ar gwir da vont d’an natur". Soñjal a ra Maëlle Ausias er vugale o chom e kêrioù bras, "en HLM dreist-holl. A bouez eo ober traoù sokial ganto, a-stroll, en diavaez eus o zi. Lod n’o deus ket c’hoariet gant bugale all e-pad tri miz !" Hag al lodenn vrasañ diouto n’o deus ket gellet komz brezhoneg da vare ar c’henfinañ. Un digarez bras e vez ur c’hamp evit eskemm gant bugale all e yezh ar vro.

Hag a vo eus ar c’hampoù e brezhoneg pe gallaoueg oc’h dedennet ganto ? Sed aze al listennad
Poursuivre votre lecture sur ces sujets
covid-19 santé société déconfinement culture bretonne culture culture régionale jeunesse famille vacances sorties et loisirs vie associative