Peizantez ha baraerez eo Bleuenn Thepaut e Plabenneg, e bro Leon. N’he doa ket kavet embregerezh ebet da eostiñ he farkadig gwinizh, e-kreiz miz Gwengolo. Neuze he deus goulennet un taol sikour digant tud he c’horn-bro : an holl anezho o doa bet gwelet o zud oc’h eostañ pa oant bihan.
Gwinizh Santez-Anna zo ur ouenn gozh eus bro Redon, bet miret a-drugarez d’un nebeut peizanted. Hiroc’h e vez da zareviñ eget gwinizhoù all. "Ouzhpenn-se em eus hadet diwezhat abalamour d’ar c’henfinañ." Setu penaos eo en em gavet Bleuenn, peizantez biologel e Plabenneg, hep diskoulm ebet evit eostiñ he farkad, e-kreiz miz Gwengolo.
"Deuet eo din ar meno da c’houlenn sikour digant tud a ouie eostiñ evel gwechall." E Plouvien, just e-kichen, he deus kavet ur vandennad gwazed o doa bet gwelet o zud hag o zud-kozh oc’h ober an eost gwechall. Asantet o deus da zont da reiñ an dorn d’ar beizantez yaouank.
Teknikoù ha gerioù
E-kerz an abardaevezh e eskemmer teknikoù… ha geriaoueg an eost. "Tro ar park, war vord ar c’hleuzioù, a vo graet gant ar falc’h. Ar peurrest 'vo graet gant an traktor hag ar falc’herezh, eme Hervé le Roux, unan eus an dud deuet da sikour. Ar pep pouezusañ evit falc’hañ a zo kaout ul laonenn lemm-tre."Bleuenn le Borgne he deus heuliet ar gentel evidoc’h.
Ar gwinizh, ur wech falc’het, a vez strollet ha staget da ober ordennoù. Berniet e vezont da c’houde, evit ma echufent da sec’hiñ, ha sammet e karr-stlej an traktour da c’houde.
/regions/2020/10/13/5f8585bf35e42_img_20201010_155239-5039216.jpg)
Ur wech sec’het ar gwinizh e teu mare an dornañ, mod-kozh adarre, gant ur mekanik a veze gwelet war ar maez betek fin ar bloavezhioù 1960.
Sachet gant an trouz
Un nebeut frioù-kurius a zo bet sachet gant an trouz. "Pa oan bihan e vezemp atav o selaou da glevet pelec’h e oa un dornerez en-dro d’ar gêr, ha d'ar c'haloup da welet, a zalc’h soñj Laorañs ar Rouz."Ne vo ket graet bara diouzhtu gant ar gwinizh-se. « Gant an ed dornet hiziv e vo peadra da hadañ un devezh-arat ar bloaz a zeu, eme Bleuenn. N’eo ket fall dija. Ha desket em eus ur bern traoù. Un eskemm brav eo bet. »
