Testeni. Marie, skolaerez, a ra war-dro bugale an dud a yec’hed a stourm ouzh ar c’horonavirus.

Marie a zo skolaerez e Penn-ar-Bed. Mennet eo d’ober war-dro bugale an dud a yec’hed, bec'h warno er mare-mañ gant ar stourm ouzh ar c’horonavirus. Kontañ a ra deomp penaos e tro an traoù er skol er mare-mañ.

Evit darn vrasañ ar vugale n’eus ket skol ken dibaoe ar 17 a viz Meurzh, pa ‘oa bet goulennet gant ar gouarnamant digant an dud chom klozet en o zi. Met lod a gendalc’h da vont d’ar skol memestra. Bugale ar vedisined, ar glañvdiourien hag an dud all a gustum labourat er servijoù yec'hed.

Marie a zo skolaerez e Penn-ar-Bed hag en em ginniget eo evit kenderc’hel da vont d’ar skol hag ober war-dro ar vugale-se. "Pezh a zo da c’houzout eo e oa dav bezañ youlek evit en ober", a lavar ar vaouez yaouank.
 

Pep hini e vurev, pep hini e roll labour


Daou zen gour a zo d’ober war-dro eizh bugel bemdez : ur skolaer hag un implijad eus an ti-kêr. Ne vez digoret nemet div sal er skol. "Rak bep noz e rank imlijad an ti-kêr naetaat ar gorreennoù ha kement tra a zo bet touchet e-pad an devezh", a zispleg deomp Marie.

Ar vugale o deus holl liveoù disheñvel, eus ar skol-vamm betek ar CM2. O skolaerien a gas d’ar familhoù dre bostel, roll al labour a zo d’ober bemdez. Marie a heuilh pep bugel war ar pezh a zo bet goulennet digantañ. "Tremen a ra mat a-walc’h", hervez ar skolaerez.

N’int ket niverus-tre ha lod a zo emren. Adalek ar CE1, dre ma ouezont lenn, ez int gouest da labourat o-unan.

"Pep hini en deus un daol-studi vihan", a gont Marie. Rak dav eo dezho chom pell a-walc’h an eil diouzh egile. Goulennet en deus Ensellerezh an Akademiezh digant ar skolaerien lakaat da zoujañ d’ "an hed sokial " etre ar vugale. Met kement-mañ a zo diaes da lakaat e plas e gwirionez.

Ar skolaerez zoken he deus poan d’en ober, dreist-holl p'o devez ar skolidi ezhomm sikour. "Azezañ a ran en o c’hichen. Kemer a ran o c’hreion ivez a-wechoù". E mod-se he deus merzhet pegen alies e vez lakaet o stilo en o genoù gant ar vugale. "Ha prestiñ a reont o dafar d’ar re all da c’houde !".

War ar porzh-skol eo memestra. "Diaes eo miret outo da chom ur metrad an eil ouzh egile, pa vezont o c’hoari", a gont ar skolaerez. Ar pezh a zo aesoc’h avat eo lakaat anezho da walc’hiñ o daouarn alies. "Komprenet mat o deus perak e oa ret en ober".
 

Maskloù lien ha kotoñs


Dibaoe un nebeut devezhioù e vez ur maskl gant Marie en he labour. Unan kotoñs, gwriet gant kemenerezed ar gumun lec’h m’emañ o labourat. Gwarezet eo un tammig gwelloc’h eget kenlabourerien all, e skolioù all, ha n’o deus maskl ebet ganto.

Ni hon eus maskloù, a gont ar skolaerez, met n’eo ket gant an Deskadurezh Stad int bet roet deomp avat !

Bemnoz e vez lakaet ganti he maskl hag he dilhad da walc'hiñ. En em ziwiskañ a ra en he c’harrdi kerkent hag erruet er gêr. Naetaat a ra ivez an holl draoù a gustum mont ganto etre ar skol hag an ti : alc’hwezioù, pellgomz-hezoug, sac'h, renkell… He seizh gwellañ a ra da viret ouzh ar virus da zont en he zi ha da gontammiñ he zud nes.

Gouzout a ra e c’hell bezañ tizhet gant ar virus pa vez bemdez gant bugale ar re a labour gant an dud klañv. Met derc’hel a ra da vont memestra evit ar vugale : "Klask a reont sentiñ ouzh ar reolennoù. Ne glemmont ket ha kompren a reont perak e rankont dont d’ar skol daoust ma chom o mignoned er gêr".
 
L'actualité "Société" vous intéresse ? Continuez votre exploration et découvrez d'autres thématiques dans notre newsletter quotidienne.
Tous les jours, recevez l’actualité de votre région par newsletter.
choisir une région
Bretagne
France Télévisions utilise votre adresse e-mail pour vous envoyer la newsletter de votre région. Vous pouvez vous désabonner à tout moment via le lien en bas de ces newsletters. Notre politique de confidentialité