Hè principiata l'edizione 2019 di a Festa di a lingua in Bastia. Una cinquantina d'animazione s'anu da scioglie sin'à a fine di u mese di maghju.
Yoga, pastizzeria, cantu o ballu, di maghju in Bastia a lingua corsa deve esse aduprata in ogni duminiu. Ghjè a vuluntà di l'edizione 2019 di a Festa di a lingua urganizata da a merria di Bastia.Per a municipalità è u so serviziu incaricatu di a lingua corsa u scopu hè simplice:
Pè st’edizione 2019 di a Festa di a Lingua Corsa, si metterà l’incalcu à nantu à e stonde à sparte in famiglia u mèrcuri è a dumenicata, da ch’elli si pòssinu sbramà i zitelli è i so genitori (o caccari) aduniti è mette li in situazione d’amparera dolce è sdramatizata cù tante pruposte oghjinche offerte nantu à isse trè settimane.
A lingua corsa cum'è arnesu
Da quì à a fine di u mese di maghju, seranu una cinquantina d'attività chì s'anu da scioglie, è incù una varietà tremenda quist'annu.
Musica, sportu o spassighjate in immersione, u scopu hè di fà chì a lingua ritruvessi u so statutu d'arnesu di cummunicazione è di piantà incù l'idea d'una lingua ugettu.
A cullettività è una vintina d'associi mubilizati
L'attività urganizate sò fatte per ogni generazione: per i zitelli, i so genitori o ancu puru per tutta a famiglia.
Una manifestazione cusì impurtente chì ùn saria stata messa in ballu senza un travagliu di una vintina d'associi.
Praticalingua, fiura mossa, Scrivimu a nostra lingua è tant'altri si sò mossi per aiutà à a Merria di Bastia.
A Cullettività di Corsica hè impignata assai ind'è issu prugettu, hà investitu quasgi 300 000 eurò.
Avà tocc'à voi!
