Mezeg e Sizun eo Benjamin Franckaert. E-kreiz Penn-ar-Bed n’eus ket bet kement a dud tapet gant ar C’hovid-19 hag er c’hêrioù bras met cheñchamantoù zo bet memestra e-doug an daou viz tremenet da-geñver an doareoù d’ober. Evit ar re glañv koulz hag evit ar vedisined.
"Beuzet on gant al labour". Leun e oa bet e implij-amzer dec'h vintin. Ne baouez ket Benjamin Franckaert da welet tud klañv er gêr pe e ti-yec’hed Sizun e-lec’h m'emañ staliet nevez ‘zo. "Met n’eo ket abalamour da zervezh kentañ an digenfinañ. Abaoe teir sizhun e teu ar glañvourien en-dro d’ar gabined."
N’hon eus ket resevet kalz a dud tapet gant ar C’hovid-19 met aon o doa an annezidi, e penn-kentañ an enkadenn, rak ur "wagenn" hag a vije deuet eus ar reter.
Benjamin Franckaert
Gwagenn ar C’hovid-19 n’he deus ket diruilhet war aodoù Breizh-izel met klasket en doa Benjamin Franckaert en em aozañ gant e getpared. Eskemmet en doa dre bostel gant medisined ar c’horn-bro e Landerne, er Faou... "Poan hon eus bet er penn-kentañ da gaout dafar evit en em wareziñ. A-raok kaout erbedoù ajañs rannvroel ar yec'hed, hon doa lakaet e pleustr ur protokol."
Da skouer, mirout eurioù emgav hag ur sal-c'hortoz ispisial evit ar re gant azonoù ar c’horonavirus. Divizet o doa ivez heuliañ ar re glañv gant pellguzuliadennoù. Respont d’an dud dre bellgomz n’en doa ket graet gwech ebet a-raok. "Lure am boa d’en ober met a-bouez e oa bet er penn-kentañ. Dre ur c’huzul a-bell, ne c’heller ket ober un enselladenn met posupl eo sevel goulennoù, kaozeal ha kas un ordrenañs dre bostel : talvoudus e oa ar pellguzuliadennoù evit ma kendalc’hfe ur c’hlañvour gant e louzaouadur, da skouer."
Sioul eo bet deroù ar c’henfinañ evit an doktor Franckaert. "Div wech nebeutoc’h a dud eget boaz. Lod a oa nec’het ha ne felle ket dezho kejañ gant ar glañvourien all ha kemer ar riskl da vezañ tapet gant ar virus. Lod all ne felle ket dezho direñkañ ac’hanomp o soñjal e oamp dall ha mezv gant al labour !"
Abaoe fin miz Ebrel eo "distro" klañvourien Benjamin Franckaert. "Ni, mezeien, hon eus broudet anezho da zont en-dro : arabat gortoz re a-raok kemer un emgav ! Gwelet hon eus tud o vont war fallaat, kudennoù ar bred ganto. Grevusaet e oa bet o anken gant ar c’henfinañ. Memestra gant tud kozh, o-unan er gêr e-pad sizhunvezhioù..."
Penaos e vo an amzer da zont, hervezañ ? " Ret eo deomp taoler evezh. Bez’e vo eus ar c’hleñved-red ch'oazh en hañv, sur eo. Betek 2022 marteze, eme arbennigourien ’zo !" Ac’hann di e ro ur c’huzul : "Diwallomp ! Un dra vat eo lakaat ur maskl, en transportoù pe er stalioù. War ar maez ivez."
