Ur steuñv a zo bet kinniget ar mintin-mañ gant Brest Meurgêr hag ar rouedad Bibus evit fin ar c’henfinañ adalek an 11 a viz Mae. Boazioù nevez a vo ret heuliañ gant an dreizhidi. Kemer ar bus ya, met ket an holl asambles hag hep disoñjal e vaskl.
Niverusoc’h e vo ar busoù adalek ar sizhun a zeu e Brest. Betek-henn ez aent en-dro evel ma raent d'ar sul a-raok ar c'henfinañ. Da lâret eo, ur bus bep eur. "70 % anezho a vo er straedoù dilun. Gwelet e vint etre 5 eur mintin ha 10 eur noz" eme Yann-Fañch Kerneis, kuzulier-kumuniezh e Brest Meurgêr.
Ledanet e vo ar c’hinnig neuze met ne vo posupl treuzdougen nemet 30 % eus barregezh ar busoù : ret e vo doujañ d’ar reolennoù divizet gant ar Stad evit ma ne vije ket re stank an dud. Evel e lec’hioù all, e vo ret kaout ur metrad etre daou zen er busoù. Berzet e vo un azezenn diwar ziv.
Cheñchamant boazioù
Ne vo ket gwerzhet tikidi gant ar vleinerien. Ret e vo bezañ komanantet pe prenañ e diked en a-arok da skouer er stal Bibus. Met n’eo ket tout : betek-henn e pigne an dud dre an nor a-raok. Ne vo ket aotreet ken e busoù Brest.
Dav e vo d’an dreizhidi mont e bourzh dre dor ar c’hreiz pe hini ar foñs. Chom hep ober gant an nor a-raok a zo bet divizet evit gwareziñ ar bleiner.
Yann-Fañch Kerneis
Dileizhennoù hidroalkoolek a vo hegerz. Pep hini a ranko bezañ masklet, er bus kement hag en ehan hag en arsavlec’hioù tramway ha fungarr. N'eo ket bet prientet pet tra c'hoazh dre ar munudoù a zispleg Yann-Fañch Kerneis. "Ne ouezomp ket c’hoazh penaos ha gant piv e vo kontrollet. Gant implijidi Bibus ? Gant ar polis ? N’eo ket bet divizet evit poent. Hanterourien a vo galvet da zont er busoù evit displegañ d’an dud penaos ober, kenkaz. Met spi am eus e vo doujus an dud diouzh ar reolennoù surentez."
Bibus a raio e lod : ingal e vo digontammet ar busoù hag an tramgirri gant un danvez kimiek gouest da lazhañ ar virusoù. Etre pemp ha dek munutenn a vo ezhomm evit en ober, karbed serret.
Pellabour pe marc’h-houarn
A-raok an enkadenn e veze treuzdouget 80 000 den bemdez gant ar rouedad Bibus. Ne vo ket posupl ober kement adalek an 11 a viz Mae. "Mat e vefe kenderc’hel gant ar pellabour pa vez posupl. Gwelet a reomp ivez gant implijerien brasañ tiriad Brest Meurgêr ha gallout a c’hellont kinnig da lod eus o gopridi cheñch o eurvezhioù labour." Ar pal eo ingalañ an tremenerezh evit ma ne vefe ket re a dud er memes koulz o klask kemer ar bus pe mont e kreiz-kêr gant o oto.
Un digarez brav e c’hell bezañ an digenfinañ evit ober sport en ur vont da labourat : kemerit ho belo ! Setu galv dilennidi Brest. Asambles gant Bibus e kinnig ar veurgêr feurmiñ ur marc’h-houarn evit 10 euro ar miz. Hentoù ispisial a vo krouet ouzhpenn kostez bali Montaigne pe bali Léon Blum da skouer. Peadra da varc’houarnañ dizañjer !
Transportoù rannvroel
E kêrioù Breizh e vo kemeret diarbennoù damheñvel. Cheñchamantoù a vo ivez er c’hirri-boutin meret gant rannvro Breizh. C’hoant zo gant ar strollegezh e vefe posupl kas ar vugale en-dro d’ar skol, evel ma oa a-raok ar c’henfinañ. Diaes e vo hervez Gérard Lahellec, eil prezidant ar Rannvro e karg eus an transportoù. "Setu ar pal met n’on ket sur e vimp gouest da dizhout anezhañ. Ne c’hellimp ket doubliñ an niver a girri-tamm nag hini a vleinerien." Ha ret e vo d’ar vugale lakaat ur maskl ? Ha piv a baeo ? Ne ouezer ket c’hoazh. Divizoù zo gortozet gant ar prefetioù a-benn dilun.
Adkroget e vo tamm-ha-tamm ivez gant ar mont-dont etre ar c’hêrioù eme Gérard Lahellec. Met ne vint ket en o reizh en-dro a-raok miz Even. Atav abalamour d’ar pellder ret etre an dud. E-karg eus an TER eo ar Rannvro ivez. 40% eus an trenioù-se a vo gouest da vont en-dro adalek an 11 a viz Mae.
